<!--
<!--<!--<!--
لما تلاقي واحد - حمار - كاتب ال SSID الخاص بشبكة Wifi بتاعه ..
زي اللى ف الصوره كدا .. وسايبه مفتوح لأي حد انه يعمل اتصال عليه ويستخدمه ..
وانت تفرح عشان صاحب الشبكة ساذج !!!
اعرف ساعتها انك انت حضرتك اللى ساذج .. !!!
عشان انت بدخولك ع الشبكه دي .. بتقع برجليك ف مصيده هو عاملهالك .. !
بالحركه اللى عاملها دي ..
- هيقدر انه يـ Access ع جهازك ويحوّل معظم اتصالاتك ال HTTPS لـ HTTP
بدون ما يظهرلك تحذير من المتصفح عن طريق SSL Strip !
- هيقدر يسرق Cookies المتصفح لأي جلسه اتصال بينك وبين أي موقع ,
ودا ف حالة لو انت من اللى بيعملوا اختيار " Remember me " اثناء تسجيل دخولهم على الفيس و الياهو الخ ... , وساعتها مش هيحتاج باسورد يدخل بيه ع حسابك ف المواقع دي .. لانه بقا معاه اللى يوازي الباسوردات دي !
- هيقدر يستخدم معاك طريقه MITM ويحوّل اتصالاتك ع الشبكه لأي صفحه هو عاوزها
- هيقدر يستخدم معاك طريقه Honypot ويعرف كل المواقع اللى بتفتحها , وخد عندك الباسوردات بالمره !
- لو فاهم شويتين تلاته .. هيدخل ع صور جهازك وملفاتك .. ويسحب اللى عاوز يسحبه !
- لو فاهم اكتر واكتر .. هيبعتلك تطبيق صغير ع موبايلك ع انه تحديث للموبايل .. واول ما تقبله .. كدا هو يقدر يتحكم ف موبايلك Remotely حتي بعد ما تفصل من شبكته وتتصل علي اي شبكه تانيه , بل ويفتح الكاميرا بتاعك كمان بدون ما تحس !!!
- هيقدر يتجسس ع مكالماتك ورسايلك عالواتس والفايبر .. وغيره وغيره !! ( حَدِّث ولا حرج )
معظم الكلام اللى فوق .. ناس كتيره مش هتعرف معناه بس الخلاصه و من الآخر ..
لو لقيت شبكه Wi-fi مفتوحه .. فكر ألف مره قبل ما تعمل دخول عليها !!!
الحدايه مبتحدّفش كتاكيت ..
ياريت الناس تاخد بالها من الحاجات دي .. !
دخولك ع شبكه مفتوحه .. كأنك بتسَلّم خصوصيتك للغير تسليم أهالي !!
المنشور ده أنا كنت كاتبه علشان احذر فيه اصدقائي من فترة و لما لقيت انه خد شير كتير فكرت انى اعممه
بعتذر عن اللغة العامية . لكن ده المتاح حاليا .
