شفتوا الحلاوة !!

بيقولك الخطوط الجوية الأيرلندية تدرس اقتراحا بفرض 50 جنيه استرليني على الركاب مقابل مضيفات يرتدين البكيني !!

وبيقولك يأتي ذلك في إطار خطة الشركة لزيادة الموارد من أجل الاستمرار في تخفيض أسعار التذاكر وتقديم أسعار أقل من الشركات المنافسة .

يعني الغني اللي عايز رفاهية يدفع فلوس أكتر من التذكرة العادية مقابل خدمات الشركة الجديدة ..

في سبيل إن هيخلّوا اللي معاهوش فلوس وعايز بس يسافر بسعر رخيص يقدر يسافر .

إزاي ؟

عاملين تذكرة رخيصة مش شاملة حاجة .. يعني بيقولك عاملين رسم دخول دورة المياه في الطيارة جنيه استرليني واحد .. ورسم استخدام ورق التواليت جنيه واحد برضه .. ولو اتزنقت يا سيدي ابقى ادفع .

حلو مبدأ تفصيص الخدمة ده .. يعني ميبقاش الموضوع package واحدة .. السفر لوحده بسعر .. الحمام بسعر .. ورق التواليت بسعر .. الوجبة بسعر .. وخد اللي انت عايزه واللي مش عايزه متدفعش فلوسه .

حكاية الـpackage دي غبية جدا .. تيجي تشتري موبايل بيبقى سعره مقابل الخدمات اللي فيه مع إن نص الخدمات دي انت مش محتاجها أساسا ..

أنا موبايلي فيه خاصية تحديد موقعك عن طريق الـGPS رغم إن الخاصية دي مش مفتوحة في مصر أصلا .

لما تروح تاكل في مطعم لازم يجيبلك مع اللي انت طلبته مخلل وسلطة وإزازة مية معدنية لزوم الـpackage .

عارفين موضة امتلاك اسبوع في أحد الشاليهات مدى الحياة دي .. الراجل بتاع الدعاية يقولك السعر .. تسأله والسعر ده شامل إيه ؟

قعد يعدلك حاجات كتير أذكر منها أجرة كلاب الحراسة وصيانة اسطبل الخيل وصيانة ملاعب الاسكواش .

يا حول الله .. اسطبل الخيل !! .. أنا مالي أنا ؟!

أنا رايح أقعد اسبوع في السنة أدفع صيانة اسطبل الخيل  ؟!

المهم إن تفصيص الخدمة ده حلو وإنك لما تعوز تسافر مش لازم تسافر في مصر للطيران وتدفع قد كده .. لأ ممكن تسافر في طيران أيرلندا وتدفع بس تمن السفر .. احم .. بالإضافة للخمسين استرليني طبعا !!