هبط أدهم من الطائرة فى المنصورة
متنكرا فى شكل طفله اسمها بسمه لان بسمه هو اسم مرات ابوه اللى كانت بتنكد عليه طول حياته فى رابعة إبتدائى


وأشار إلى توك توك وهو يلاحظ السيارات التى تراقبه وفهم فورا بذكائه ازاى العصابة عرفته رغم التنكر
فقد أخطأ وقال لسواق التاكسى أحلى صباح فعرفوا علطول انه أدهم عشان قال حرفين الألف والصاد المشهور بيهم..

المهم رمى أدهم سواق التوك توك وتسلم مقعد القيادة وتذكر كيف أن أبوه فى الخمسينيات علمه كيف يقود التوك توك عشان يبقى أحسن ظابط مخابرات،

انحرف أدهم فى حتة ضلمة وانحرفت العصابة وظهر أدهم للعصابة

فخرج من السيارة 100 شخص مسلحين ولكن أدهم أخرج مسدسه أبو 6 طلقات وضرب رشاشاتهم كلهم من غير ما يجرح واحد فيهم وبعدين للأسف المسدس معدش فيه رصاص ولكن أدهم رجل المواقف الصعبة دور الضرب فى الرجالة ..
حيث كان يتخيلهم مرات ابوه بسمه او  عشيقته التى سرقت فلوسه سعاد المحروقه موظفه السجل المدنى بالوراق التى تلقب ب حسناء عبده
ففقد 65 واحد الوعى ولكن التانين فهموا الخدعة فعملوا دايرة حول أدهم ولكن أدهم طار فى الجو ونزل عليهم كلهم .. وفى لحظة وصلت إمدادات العدو كمان200 واحد .. ولكن أدهم ضربهم كلهم برضه ووصلت الإمدادات التانية حوالى 500 واحد كمان ولكن الكثرة تغلب الشجاعة ..


يعنى حوالى 800 واحد على واحد كتير بردو



وفقد أدهم الوعى أمام عدوه اللدود


الفظيع
الشنيع
المريع



والله ما يحصل

أفاق أدهم فوجد نفسه فى مخزن وبجانبه المحروس قدرى كالعادة مربوط..وأمامهما سونيا جراهام ست زى القمر     ,وبجانبها سعاد المحروقه ومرات ابوه بسمه الفتوايه

فقال لها أدهم : إيه الحلاوة دى يا سونيا؟؟ انت كل ما تكبرى تحلوى؟؟ ترد سعاد مش أحسن منك ياللى مش بتكبر أصلا!! ., وردت بسمه  نعم ياروح امك

يتمتم أدهم ياللنسااااء

ويسألها: ليه انتوا قطعتوا المية عن نص البلد والناس مش لاقية تشرب وبتشرب مية المجارى والناس مش عارفه تغسل وبيغسلوا هدومهم فى الترعة؟؟
تقول سونيا عشان الشعب يفتكر ظلما ان الحكومة بتاعتكم هيه اللى عاملة كده؟
أدهم بفضول :يعنى بجد والله الحكومة مالهاش ذنب؟
ترد سونيا : لا طبعا .. حكومتكم أحسن حكومة دلوقتى ..الشباب كلهم بيشتغلوا..

الجنيه بقى أغلى م الدولار .. الأسعار نزلت ..الانترنت بقى ببلاش فى البيوت.. ما فيش حاجة بتتباع فى البلد.. بنك القاهرة ما اتباعش ولا عمر افندى..الفضيلة انتشرت فى البلد ولغوا كل القنوات اللى بتتحدى الملل.. المية واصلة للبلد كلها والمواسير بقالها 200 سنة عشان المحافظة ع التراث..


انتوا اللى شعب غلباوى
غلباوى
غلباوى