مش كافر
*******
مانيش كافر ... عشان صوتي ماهوش صوتك

ومش فاجر ... عشان ما بكيتش على موتك
...
ولا مندس ولا قِلة ... ولا تخرجني مـ المِلة

سايعني وسايعك الملكوت ... ماتحبسنيش فـ ملكوتك

مانيش كافر ... عشان صوتي ماهوش صوتك

*************************************

أنا مش هرضى اكونلك عبد ... ولا هتكونلي يوم سيد

هعارض وقت ما انا عاوز ... ووقت ما احب راح أأيد

فمش لازم تصورني .. بإني الخاين اللي بهد

وتبقى الفارس المغوار ... اللي بيبني ويشيّد

فلو هتعيش فـ دور يونس ... ساعتها هقوم بدور حوتك

مانيش كافر ... عشان صوتي ماهوش صوتك

**************************************

مافيش داعي تكونلي إمام ... واكون خلفك برد آمين

ولو أنعم عليك ربي ... ما يعنيش إني مـ الضالين

قريت الآية معكوسة ... فصلي السهو واستغفر

ده أحيانا ضلام الجب ...يبقى السر فـ التمكين

فلو غرك فـ يوم ضعفي ... ما تتغرش فـ جبروتك

مانيش كافر ... عشان صوتي ماهوش صوتك

*************************************

هتتجنن وتبقى إله ... عشان بالزور تكفرني؟

وتتشيطن بإجرامك ... تفجر صوتي تقهرني?

هتتنتور شظايا الكلمة في المسمع ... وهتسمع صمم كوني

وهتشقق صنم صوتك ... واكون كعبتها وتزورني

تصلي صلاتها جهرية ... يرن صداها فـ سكوتك

مانيش كافر ... عشان صوتي ماهوش صوتك

 بقلم الشاعر الدكتور أحمد أسامة
الجمعة - 27/12/2013
03:22 p.m.