بقلم /الكاتب أحمد حافظ : اسمحولي أقول كلمتين من وجهة نظري، بس بدون تطاول لا مني ولا من حد، خلينا نتكلم باحترام مرة في حياتنا.. السيسي النهاردة جاب من الآخر في موضوع الجزيرتين، وقال إنه استند إلى وزارة الخارجية، والمخابرات العامة، ووزارة الدفاع في إن الجزيرتين ملك للسعودية، انت بتقول عواد باع أرضه، طب هو قال إنه سأل الخارجية وقالت عندها ما يثبت وسأل المخابرات وقالت عندها ما يثبت وسأل الجيش وقالت عنده ما يثبت.. يعني عواد ده حضرتك مأخدش القرار من نفسه، ولا كان يجرؤ ياخده من نفسه، سيبك بقى من الخارجية وموقفك منها، ياسيدي اعتبرها خاينة. طب هل الجيش في نظرك خائن وبيبيع أرضه؟ هل المخابرات العامة في نظرك خائنة وبتبيع بلدها؟. لما انت بتخون الجيش والمخابرات اللي هما أساسا بيحموك بعد ربنا، فاضلك مين تتسند عليه علشان يتصدي لأي تهديد لبلدك وأمنك وحياتك وبيصون عرضك؟. مين هو السيسي؟. السيسي ده مجرد موظف جاي يأدي مهمة وماشي، ولا يجرؤ مرة تانية إنه يبيع ولا يتنازل لأن البلد دي مش بإسمه علشان يتحكم فيها.. لكن جيش بلدك هو اللي باقي لك وكل يوم يموت ناس منه علشان مش يسيب الإرهابيين يتكمنوا من تراب سيناء وغيرها.. كان إيه اللى جابر الجيش إنه يعمل كده مكان سابها وهي صحراء كده الناس تقعد فيها براحتها، فجأة الجيش بقي خاين؟ انت لما بتقول عواد باع أرضه يبقى بتهين جيش بلدك وبتدوس عليه وعلى كرامته وعلى عرضه، وجيشك ملوش أي مصلحة إنه يبيع ولا يتنازل، وجيشك ملوش أي علاقة ولا ذنب في إنك مختلف مع رئيس الدولة في الرؤية والفكر والإدارة.. عواد مش بالقوة إنه يفرض على الجيش يبيع ولا يتنازل. عايز أكد على حاجة مهمة جدا، قبل ما تتطاول ولا تسب وتلعن فيا، لازم تعرف إنك في نظري مش خاين ولا عميل ولا عايز تثير أزمة، ولا من حقي أحطك في الخانة دي، ومش من حقك تشكك في وطنيتي وتقول عليا طبال السيسي، أنا لا يعنيني سيسي ولا يعنيني أي مسئول في البلد، واللي يعمل خطأ ياخد فوق دماغه، بس فيه عقل بيقول إن الجيش ده وطني ومحترم وشريف، حتى لو فيه ناس بتسيء فيه للبدلة العسكرية، بس الكمال لله وحده.