الحب مش قضية ..
اتغيّرت أيّامي .. 
مش هي دي  كانت .. أيامي !
اتبددت أحلامي .. 
مش هي دي  كانت .. أحلامي ! 
طالت معاه .. سنيني .. 
وزادت معاه .. ألامي .. 
أنْسَ اللي فات .. يا قلبي .. 
ولا .. تشغل بالك بيه 
واللي غدر بك  يا قلبي .. 
بكرة ربك .. يجازيه 
حبيت .. وأخلصت في حُبّك .. 
واللي اِفتكرته حَبّك             
قلبه .. مش زي قلبك .. 
قلبه .. ظالم .. وأناني
حاول .. يا قلب تاني .. 
ودور ع الحُب تاني     
يمكن ترجع .. وتحب تاني
*******************
الحب مش قضية .. 
نترافع  فيها .. واحد  يتِّهِم .. 
والتاني  يُرد 
الحب مش لعبة .. نلعب بيها .. 
واحد يشوط .. والتاني يصُد 
الحب مش الضد .. 
واحد يبني .. والتاني يهد 
الحب مشاركة .. مابين حبيبين .. 
هات وخد
ولو قلبك .. وقع فـ الحب .. 
مع قلب .. ما يعرفش يحب 
حاول .. يا قلب تاني .. 
ودور ع الحُب .. تاني 
يمكن ترجع .. وتحب تاني
*******************
أنا من طبعي .. 
أكتب أشعار وأغاني
وفـ قربه ..
تاهت مني .. كل المعاني 
هوّ فيه شاعر يحِب ! .. 
أو يكتب عن الحُب 
أو يعيش له  حُب ! ..
والكل .. مخاصم التاني !
الدنيا حلوة .. لو صِعبت .. 
دور ع الفاعل والجاني 
حاول .. يا قلب تاني .. 
ودور ع الحُب .. تاني 
يمكن ترجع .. وتحب تاني
*******************
الحب مش قضية ! ..كلمات .. سعد المهدي