إش إش إش 
الكل بقى بيغش
تعيش لو كنت حرامى 
ولو كنت شريف متعيش 
الدنيا اتغير حالها
معرفش إيه اللى جرالها 
ضهرها فجأه بقى وش
المستشفى مليانه 
ناس مرضانه وعيانه 
والدكاتره محضرتش 
تسأل عنه كالعاده 
يدوك عنوان العياده 
يفرح بقدومك ويبش
الأستاذ عاوز حقه
ياكل ويحلى بقه 
كدا وإلا ميشرحش
ومهندس ضميرو بعافيه 
والمصلحه ابدا مش ماشيه
غير لما كام ألف ترش
والتاجر عمال بيخزن
والله بقت حاجه تحزن 
خلونا هنام ع البرش
وموظف فاتح الدرج 
نفسه يسيب لحماده برج
زهقان من العيشه فى العش  
ويصلى ويصوم ويحج 
عمل اللى عليه عم الحاج 
خلوه بقى ع الجنه يخش
كله بيسرق من كله
ويقول أنا أبدا مش شكله 
هوه الضهر وانا الوش 
إش إش إش 
منير خاطر