عيش وخلى غيرك يعيش
وزود شويه فى البقشيش  
ميبقاش معاك وتقول مفيش 
دا كلام عند ربنا ميمشيش
 
عشى الفقير وامسح دموعه 
شويه م اللى معاك بتوعه
مش هيخسرك إلا جوعه
دا لحم اكتافك من ضلوعه
 
طول ما جارك بينام جعان
وانته متعشى وشبعان
وطول نهاره فى الهوان
غدر الزمان ملوش امان
حقه وياك متحوشوش 
اديهوله..... متزعلوش
مش يبقى له وتقول ملوش
أحسن يضيع عمرك فشوش
متقولش مش مكفينى 
والغلا يوماتى كاوينى
خلى الكلامده بينك وبينى
أنا اللى فاهمك يا نور عينى
مش خايف م اللى جاى بكره
ومتصدقتش ولا مره
وعمال بتعبى فى الجره
وعامللى واد فهلوى وعتره  
 
قادر ربنا يغنيه ويفقرك
والجوع ينشف معدتك
وساعتها بكلامك نفكرك
ونقولك سبحان من غيرك
منير خاطر