غــــــــــياب  ..... عاميّة
.......................................
الغياب ياحبيبي ... غياب
ليل ، ووَحشه ، وإضطراب ،
وفُرقه ، وخَنقه ، وعقل غاب
ومليون سؤال ... من غير جواب
وزمن غريب  ... أمره عجيب ..
فرّق م بينّا ، وخَد م جاب
وعقل مصاب ... من كتر العتاب
تايه بيسأل : فين الصواب ؟
ف زمن بيفرّق ... الأحباب
وكل صباح اقول له : ســـــماح
ألاقي دموعي ... صفحة غياب 
الغياب ياحبيبي ... غياب
*****************
نار ، وبتحرق قلبي ف بُعدِك
وانا باتعذّب هنا من بعدِك
وجنّتي ابقى معاكي ف قربِك
وقُربِك صوره باشوفها ســـــراب
وصوتِك بعيييد ... كأنّه عيد
ودُعا الغريب المُستجاب
وحنينُه دايماً ... للإياب
إعلى ياصوت ... قبل م اموت
من بُكى الناي ، والرباب
واحييني ، وخدني معاك وديني
أتاريني غياب .. جوّاه غياب 
الغياب ياحبيبي ... غياب
*********************
شوق ، ولهفه .. بركان عواطف
لا حد راحم ، ولا حد عاطف
ولا حد رايق ... بين الخلايق
ولا وش بشوش ... بين الوشوش
وف كل الوشوش ... غيرك م شايف
أصل انتي درّه من المواقف 
اللّي يعيشها معاكي ... يعيش
واللّي غايب ... ليه حظه واقف ؟
ونصيبه ف هواكي .... م يلاقيش
ياقمر ياغايب .... فين الحبايب ؟
سألت عليهم ... في كل دار !!!!
ولا اللّي غايب ... م لوهش نايب
ويدُور عليه ....  زمن غدّار ؟؟؟؟
أمانه يادنيا ... شويّة هداوه
بالراحه عليّ ... م تِجْرَحينيش
لا بإيدي غياب ، ولا الشقاوه
دا اللّي بيرضيكي ... م بيرضينيش
وكفايه ... راح مني زمن الحلاوه ،
والباقي يادووووب .... م يكفّنيش
كفايه ... اكسبي فيّ ثواب 
ح تورّيني إيه تاني عذاب ؟؟؟
كفايه اللّي شفته في الغياب 
دا العذاب ... هوه .... غياب 
الغياب ياحبيبي ... غياب 
********************************
الشاعر / رفعت ابو العلا