يا بلدنا يا طيبه 
يا مستحمله وساكته 
ناس فيكى متعذبه
وناس كتير سكه 
اللى خطف طياره 
واللى بيوقع عماره 
واللى عزم السفاره 
واللى سرق شركه 
واللى بيحارب فساد
واديه فى جيب العباد 
خلوا حياتنا سواد
وغرقنا فى البركه 
بيا خد الف جنيه
ويقيد البرج شاليه 
ويسقط على اللى فيه
ويزور النبى فى مكه
بيتاجروا فى العمله 
قطاعى وبالجملة 
سخطوا الجنيه نمله 
معادش فيه بركه
كله بيقول يا نفسى
تهليبه من نفسى
امشى ف العكسى
وتتعطل السكه
تدخل المصلحه
وزاره أو مرشحه 
الكل فى الرحرحه
نايمين على الدكه
هنقول إيه وللا إيه 
وباء وصابنا يا بيه
والكل عيان بيه
موقف لنا الحركه
مشكلتنا فى الضمير 
نايم بقالوا كتير 
ولو نقول تطهير 
يتبقى مننا سته
منير خاطر