وحشاني
@@@@@@@
أول كلمه جت ف لساني
حلوه وسهله وفيها معاني
تدخل جوه القلب بسرعه
معني يأثر جوه وداني
نفسي أقولها ف حضنك مره
نفسي أنام علي حجرك تاني
ضلمه الدنيا بعد رحيلك
نفسي أشوفك حتي ثواني
زي الشمعه ف قلب الدار
نورها ينور حتي جيراني
إيدك بلسم يشفي جروحي
لمسه إيدك لما أعاني
تمحي ف قلبي هموم الدنيا
ألقي الفرحه ف قلبي أغاني
فاكر كل كلامك ليا
دفعه قويه ف كل كياني
لكن بعد رحيلك عنيي
مين هيخفف من أحزاني
مين هيشيل من عيني الدمعه
لو كان صوتك كان قواني
إبني ضنايا حبيبي الغالي
أجمل كلمه جوه وداني
كلمه تأثر فيا كتير
كلمه تغير من وجداني
وسط ظلام الليل بتصلي
تدعي المولي يزيد إيماني
تدعي لأبويا واخويا وأختي
دعوه تحقق كل أماني
فاكرك يامه لما تقولي
إبني ضنايا حبيبي الغالي
بكره هفوت الدنيا يا ولدي
إوعي ضنايا ف يوم تنساني
خليك فاكر كلمة أمك
خليك حافظ للأحساني
ولدي حبيبي لسانك طاهر
قارئ فاهم للقرآنِ
خليك واعي وصية أمك
سلّم قلبك للرحماني
تسعد طول العمر يا ولدي
تسلم من كيد الشيطانِ
أيوه يا أمي أنا هفضل فاكر
رغم انا حاسس بالحرماني
لكن راضي بحكم الله
لما دعيت المولي هداني
عمري ما هنسي كلامك ليا
إسمك ساكن جوه لساني
صورتك ليل ونهار قدامي
آه لو يرجع تاني زماني
كنت هقولها بصوتي قويه
أمي يا أحلي الناس وحشاني
@@@@@@@
بقلم // طه إبراهيم
