(( مواكب العِشق )) .......... عاميّة
....................................
يامواكب العشق ...
السارْحه في الملكوت
خديني عاشق ف رْحابِك
أتهنّى بعِشقِك ....
قبل م اموت
دا انا قلبي عاشق ،
وواقف على بابِك
من يوم م اتولد ،
بيدوب في تراب البلد ،
وعشقُه ( صامت )
من غير صوت !!!!
.................
يا مواكب العشق ....
السارحه في الميادين
خديني ( مصلّى )
للساجدين
المؤمنين الطاهرين ،
وخلّيني ( خنجر ) ....
بينحـــَر ......
كل تجار الدين
خديني ( مسبَحه )
تسبّح .......
في إيدين الطيّبين
البيضه المعطّره ...
بالورد والرياحين
أو حتى ( تعويذه )
تحمي الأحبّه .....
من الشياطين
أو حتى ( ما شاء الله )
وخرزه زرقا
تحمي الصبايا
من شرْ العين
.....................
يا مواكب العشق
أنا قلبي رحّاله
وكل يوم في حالهَ
بيعشَق ، ويتمعشَق
ويحب القلوب الصالِحَه ،
ويحب ( عِطر الأضرحَه )
ويكره كلمه ( مزيّفه )
إترسمت مرّه في الخَفا
على الوجوه الكالِحه
أنا قلبي ... ( شباب )
مع الأحباب ،
وبيفتح دايماً كل باب ،
ويدعِي دايماً للّي غاب
قافِل ( كل شبابيك الهوى )
وما بيفتَح إلا .......
( للدعاء المستجاب )
......................................
الشاعر رفعت ابو العلا