يارب نفهم 
عصفور ومضلل على عشه
حبة قش وورقة توت
نافش ريشه وبان على وشه
إنه كتير فرحان مبسوط
حتى الريح مقدرش يهشه
وياما الريح هدت فى بيوت
مش علشان قوته أو كرشه
ولا حتى لأنه جميل الصوت
ولا بيخاف ان صياد قفشه
ولا بيهمه ان كان هيموت
اصله مرتب عشه ونقشه
يبهر كل اللى عليه يفوت
وما يسمحش لحد يناقشه
أما عليه حبة جبروت
جوه العش صغاره اتعشوا
وناموا كمان فى ميعاد مظبوط
ولا وليفته بحركة رمشه
تفهم ايه هو المقصود
يصحى الصبح ويهجر فرشه
علشان أكل اليوم والقوت
ولا يقبل لو حد يناقشه
علشان عصفور مش هلفوت
آه لو هانوا كرامته وخدشوا
حياؤه هيضرب بالنبوت
عصافير ايه اللى هيتغشوا
فى شوية فرافير بسكوت
ده احنا يا ناس عصافير لو طفشوا
من العالم راح يبقى تابوت 
دى العصافير لو كنسوا ورشوا
الظالم يصبح كتكوت 
والجنيا تزقزق لو خشوا 
فى بلادنا والظالم ياخد شلوت 
R.K