طلع الشعار مو مجرد “صح”.
الشعار هذا صممته وحده اسمها كارولين دافيدسون – Carolyn Davidson، كانت أيامها طالبة في جامعة بورتلاند – Portland State University في ولاية أوريغن، أمريكا. كارولين كانت متخصصة في تصميم الجرافيك – Graphic Design وتعرفت على مدرس محاسبة اسمه فيل نايت – Phil Knight وبدت تسوي له بعض التصاميم حق شركته الخاصة Blue Ribbon Sports.
فيل نايت كان مخطط يطرح ماركه يديدة لتشكيلة من الأحذية الرياضية في شركته سنة 1972م، ولا يطلب تصميم الشعار من كارولين بحكم الأعمال السابقة معاها وخبرتها وعطاها نظرته واللي يبيه منها في الشعار، اتفقت معاه يدفع دولارين أمريكي عن كل ساعة تشتغل فيها حق التصميم.
في شهر يونيو 1971م قدمت كارولين مجموعة من الشعارات لفيل نايت وبعض الإداريين في شركته؛ بالأخير اتفقوا على الشعار الحالي المشهور بإسم “Swoosh”.
فيل نايت بالذات ما عجبه التصميم ذاك الزود وقال حزّتها: “I don’t love it but I think it will grow on me”.
يوم وافقوا على الشعار خلاص قدّمت كارولين فاتورة بقيمة 35 دولار أمريكي فقط عن الشعار 
دفعوا لها المبلغ المطلوب وراحوا شافوا شغلهم.
واليوم صار من أشهر الشعارات في العالم!
سنة 1983م بعد ما اشتهرت الشركة وشعارها تميّز قام فيل نايت وأرسل لكارولين خاتم ألماس بشكل الشعار ومعاه ظرف فيه أوراق أسهم بإسمها في الشركة كتعبير عن الشكر لتصميمها.
الشعار هذا بالأساس يرمز حق جناح تمثال آلهة النصر الإغريقية في الأساطير “نايكي” – Nike، التمثال موجود في بقايا مدينة إيفيسز – Ephesus الأثرية في تركيا وهذي صورة عنه:
بس؟ هذي القصة اللي عندك؟ 
أدري القصة خفيفة وبسيطة مافيها أكشن ودراما، بس اللي فكرت فيه إذا أنا شفت شي واستصغرت حجمه اليوم ما راح أتصور شلون بعد فترة ألقى وزنه عند الناس كبير وله ثقل وسمعة والناس تحبه، حتى انا راح اطالع هالشغلة بصورة مختلفة وراح يتغير انطباعي عنها. يعني تخيل يوم عرضوا اقتراح الشعار على الشركة كل اللي شافوه مجرد “صح” بلون أسود. شي أقل ما يقال عنه بسيط، وما ينلام اللي يقول سخيف، مافيه إبداع ولا عمق واضح. بس جودة اللي قدمته الشركة اهي اللي رفعت من الشعار ووصّلته إلى الصورة اللي نعرفها اليوم.
إسمك وإسمي وإسم كل واحد فينا بهالدنيا على هالحال، مجرد إسم عادي وتلقى اللي بنفس إسمك آلاف، بس بالأخير كل واحد يصنع إسمه ويميزه بعمله ويكوّن سمعته. عاد بعدين يركز ببال الناس إسمك على حسب الصورة اللي بنيتها، والتاريخ أكبر شاهد للشخصيات على مر الزمن.
معلومات سريعة عن نايكي – Nike:
1- فيل نايت هذا الحين رئيس مجلس إدارة نايك ويُعتبر المؤسس المشارك للشركة، أسسها مع بيل باورمان – Bill Bowerman اللي توفى سنة 1999م.
2- في الأساطير الإغريقية تُعتبر نايكي آلهة القوة والسرعة والنصر، بس مميزة أكثر شي بأجنحتها في القصص وتلقّب بـ”آلهة النصر المجنّحة” – Winged Goddess of Victory.
3- اسم نايكي ينكتب ومعروف بأكثر من طريقة، منها: نيكولاس – Nicholas، نيك – Nick، نيلز – Nils، نيكولاي – Nickolai، كلااس – Klaas، نيكول – Nicole، نيكي – Niki، آيك – Ike، نيكيتا – Nikita، نيكولا – Nicola، نيكيتاس – Nikitas.
4- كاس العالم السابق المسمى بكاس جولز ريمي – Jules Rimet Trophy فيه تجسيد لشخصية نايكي وهي شايلة شغلة مثل جدر هريس كبير لول. هذي صورة الكاس السابق اللي انباق وما لقوه لي اليوم بعد ما فاز فيه المنتخب البرازيلي:
5- رسم نايكي يعتبر الأكثر شهرة واستخداماً على العملات المعدنية الإغريقية.
6- المقولة المشهورة اللي ارتبطت بشعار شركة نايكي “Just Do it” هذي قالها المؤسس المشارك للشركة الإعلانية Wieden+Kennedy اللي تعاقدت مع شركة نايكي، اسمه دان ويدين – Dan Wieden وأضافها في الحملة الإعلانية سنة 1988م، فازت المقولة بلقب أحد أفضل خمس شعارات إعلانية في القرن العشرين. دان ويدين قال انه استوحى الشعار من آخر كلمة قالها واحد اسمه غاري مارك غيلمور – Gary Mark Gilmore قبل إعدامه سنة 1977م بتهمة جريمتين قتل في مدينة يوتاه – Utah، والغريب ان المجرم نشأ ببورتلاند، أوريغن – نفس المدينة والولاية اللي طلع منها فيل نايت وكارولين اللي سووا الشعار حق الشركة 
.
يعني الظاهر يوم قالوا له عندك كلمة أخيرة؟ ولا يقول : Let’s do it! 
… أعدموه بإطلاق النار.
المصادر/
ساحة النقاش