رسالة اليه
======
حبيبى ورفيقى الغالى
رسالة ليك اه يا غزالى
يا نص عمرى وحبيبى
يا شريك حياتى ونصيبى
لو نقدى ليك يعنى اشارة
لكتر حبى بنظارة
وكنت حلمى والفارس
وعليا تبقى الحارس
قبل الجواز كنت رياضى
بجسم ممشوق مش فاضى
وبعده فجاة طلع لك كرش
وبقيت بخيل وساعات بتغش
لو كنت اعرف يا حبيبى
كنت رفضتك يا نصيبى
اكلك ده فول مع طعمية
ومخللات حلوة شهية
فين الفراخ ويا الرومى
واللحمة اقطع فى هدومى
وتقول لى ماتحبش تبذير
كلام اونطة انت بخيل
وكمان فلاتى بعيون زايغة
تحب شقرا كده مايعة
او حتى سمرا بشعر طويل
و كل يعنى بنات الجيل
وانا اللى كنت مزة زمان
وتقدموا لى كتير عرسان
لكن نصيبى جنان فى جنان
وفزت بيا ياابو سلمان
والكذب عندك يعنى اصيل
كتير ويملا فى نهر النيل
عشمتنى كده بالحلقان
خرمت ودنى وعقلى كمان
عصبى ودايما تتنرفز
وتقول سيبونى نفسى انفس
تشرب سجاير وفى شيشة
وتقول لا حيلتى تعريفة
ولو اتخانقنا على سهوة
تجرى بسرعة عالقهوة
وكنت جان وبشعر كتير
طلعت باروكة بصلعة خير
وما فيش فلوس ولا حتى القرش
وكفاية يعنى علينا الكرش
وفى النهاية انت حبيبى
ياابو عيالى ونصيبى
دى مناغشة يعنى كده وهزار
وانت قدرى ليل ونهار.
=====
مع تحيات الفقير إلى الله
ياسر شرف كبير محررين مترجمين
باتحاد الاذاعة والتلفزيون
