انا المواطن المسكين .....
انا اللى شايل الهم سنين
انا اللى طول عمرى اقول الآه
وانتم طرش مش سامعين
انا اللى بقول منكم لله
وقلوبكم صخر ما بتلين
شفت المر وعايش وياه
وانتم جمعتم الملايين
انا اللى اجاهد
وانا اللى أحارب
وانا اللى ازرعلكم ف الطين
انا اللى البرد كل عضمى
وانتم ع الحرير نايمين
انا اللى قلتولى أتحمل
لسه فاضل خطوتين
وانا اللى من يومها مستنى
اشوف من عمرى
يومين حلوين
انا اللى غناكوا من فقرى
وانا اللى من ضعفى مستقوين
انا اللى قلتولى أصلها أرزاق
مقسمها رب العالمين
وطلعت بعيد عن الاخلاق
وملهاش دعوه ابدا بالدين
انا اللى بتاكلوا من لحمى
ومن دمى كمان شاربين
انا اللى ببوس ف اديكم
عشان تزودونى جنيهين
وتقولولى الظروف صعبه
والاقيكم ف الهنا هايصين
وأقل واحد يصبرنا
خزنتو فيها مليارين
انا اللى لو اشرحلكم حالى
افضل اتكلم كدا شهرين
بكره نتقابل من غير المال
قدام أحكم الحاكمين
وربك ينصف المظلوم
وينتقم م الظالمين
انا المواطن المسكين
منير خاطر
