غزومه تجنن

الرز بالخلطة انا بحمر بصلة صغيرة جداا لحد ماتكون براون ونحط الرز وعليه قرفة وبهارات لحمة ونقلب كويس لحد مايسخن ونحط الشوربة ولما يستوى نزين بالمكسرات






اسبرينج رول نحط بصلة شرايح فى زيت مع جزرة مبشورة وكوسة مبشورة وكرنب ابيض ونقلب ونتبل بملح وفلفل وجنزبيل وصويا صوص ولما الماية تنشف وتبرد نحشى ونلف ويقلى فى الزيت




الشيش طاووق نتبل الفراخ قبلها بيوم فى زبادى وخل وملح وفلفل وبابريكا وزيت وبهارات وبشر بصل ناعم جدا وتانى يوم نحط فى العيدان الخشب مع الخضار ونحطه فى طاسة سخنه بها شوية زيت ونكمل سوا فى الفرن





البيتزا 3ك دقيق - ام ك خميرة فورية - 1م ك بيكنج بودر - 3 م ك سكر - 3 م ك لبن بودرة - ربع ك زيت - 1ك ماء دافى ملحوظة حسب العجن - ملح

نحط الاول 2 ونص دقيق ولبن البودرة والسكر والبيكنج بودر والخميرة والملح 1م ص ونخلط وبعدين نحط الزيت والماية الدافية حسب العجين ونشوف اذا احتاجت باقى الدقيق ولا لاء ونغطيها لحد ما تخمر وبعد ما نشكلها ونحط الحشو نخليها ترتاح 10 دقايق وتدخل فرن حامى من 10 الى 15 دقيقة

الطريقة دى اخدتها من منال العالم ان شاء الله تعجبكم




السلطة دى عبارة عن حمص الشام مسلوق فاصوليا بيضا مسلوقة علبة ذرة صفرا حلوة

نتبلها عصير ليمون ملح فلفل معلقة خل وزيت زيتون ويفضل التتبيل قبلها بفترة علشان الطعم وقبل التقديم نحط شبت وبقدونس

انا كمان كنت حاطة بصل اخضر مقطع صغير