د. محسن الشرقاوى " نفسى أنام فى حضن أمى ..! "

** قصيدة : نفسى أنام فى حضن أمى ..!! **

نفسى أنام فى حضن أمى .. اللى ماتت من زمان ..

نفسى أسمع كلمة حلوة .... فيها رقة وحنان ....
نفسى أحس بأنى عايش .. ف الدنيا دي إنسان .. 
أمى بس .. اللى كت محسسانى ... بالأمان ....!!
نفسى أشوف طلة قمر .. ف ليل طويل ..
نفسى ألاقى ضلة شجر .. راحة لعليل .. 
زى مابحس البشر .. من جوه قلبى .. 
البشر يحسوا بيه ... وبقلبى الجميل .. 
نفسى أنام فى حضن أمى .. اللى ماتت من زمان ..!!
**********
صعب تعيش حياتك .. تحلم بالمثالية ..
وضميرك دايما صاحى .. حاسس بالإنسانية .. 
والعالم من حواليك .. مليان وحوش برية .. 
كله طمع وزيف .. وظلم .. وأنانية ..
وأنا أعمل أيه ياعالم .. وأعيش أزاى ياناس .. 
ف دنيا ضاع جمالها .. وأنعدمت الأحساس ..
نفسى أنام فى حضن أمى .. اللى ماتت من زمان ..!!
********
هى ّ دنيا لازم نعيشها .. دبنا فيها أو حرمنا نفسها منها ..
والليالى هنقضيها بأى شكل .. مهما كان لونها وجنونها ..
مكتوب علينا .. رحلة زمن .. قصر أو طال .. 
مكتوب علينا .. فرح وشجن .. على أى حال ..
الرب عالم باللى جارى .. رضيت يارب بالأحوال ..
ليك حكمتك .. ولحكمتك .. أنا فى أمتثال .. 
نفسى أنام فى حضن أمى .. اللى ماتت من زمان ..!!
د. محسن الشرقاوى