((**الغربة**))بقلم / أحمد حسانين

آه وآه منك ياغربه

سرقتى مننا الاحلام

الامل كان فيكى كدبه

وبحر كبير من الاوهام

بين ايديكى احنا لعبه

والكفيل عاوزله نسبه

والحياه مره وصعبه

وكله يقول هتدفع كام
مكفاهمش اللى دفعته
شباب عمرى اللى ضيعته
وحلمى الغالى ودعته
وسنين الغلب والالام
كل ده ومهوش كفايه
والمرار مالوش نهايه
والزمان عاند معايه 
ومنى زعلت الايام
والوطن ف عيونى طارح
شوق كبير بالفكر سارح
اتغابيت وحاولت اناطح
غربه بتطحن ف العظام
لكن مسيرى يابلدى هارجع
والعيون معدتش تدمع
بعدى عنك مش هينفع
تانى يابلد الكرام
مش راح ابعد تانى عنك
مش راح ازعل تانى منك
راح اعيش العمر جنبك
وفيكى هقول احلى الكلام
آه وآه منك ياغربه
سرقتى مننا الاحلام