جارى التحميل
استخدم زر ESC أو رجوع للعودة
فى لحظه خوف
بقــــلم تـــــــامر النقـــــــيب
ـــــــــــــــــــــــــــــــ
فى لحظه خوف
عيون مليانه بالدمعه
ومش بتشوف
وأم حزينه مهمومه
وشايله قلبها المخطوف
قامت من نومها مفزوعه
محمد قوم
هتتأخر على دراستك
ضربو الجرس
نسيت بأنه معتقل
وسط الحرس
صرخت بصوت مدبوح
فين الامان
فين الونس
فينك ياعدل في البلد
تجيب حقوق اللى اندهس
رفعت إيديها للسما
وقالت يارب
انصفنا من كل الخبث
انا ولدى راح
من غير سبب ليه انحبس
سكتت شويه
وصوتها كان مخنوق
قعدت بجمب الحيط
مش عارفه إمتى تفوق
بتنادى يابنى ياحبيبى فين خدوك
مش عارفه طب فيك إيه
في بلدنا ليه ذلوك
غمو عينيك بالظلم
اخاف يقولو قتلوك
تدعي لرب السما
ومليانه بالحرقه
عايشين بفقر وألم
وحياتنا فيها سرقه
ضربو كمان الرصاصه
دخلت برجل أخوك
خايفه عليك ياضنايا
أحسن ف يوم يبعوك
راحت ف يوم الحكم
تسمع كلام قاضى
ابنك ياست ليه
بعيشته مش راضى
هى البلد دى خلاص
ربيتكو ع الفاضى
لازم ياستى تفهو
تموتو لاجل نعيش
احنا كبار البلد
وانتم بقى الدراويش
يابنك يكون عاقل
يايكون خلاص ومفيش
بكيت وقالت خلاص
أبنى ده يطلع إيـــــه
انتو الكبار واحنا
ولانسوى ربع جنيه
سيبونا بس نعيش
تأمر يا سيدنا البيـــــه
ضحك اللى كان حالف
إنه يكون عادل
وقال شويه رعاع
وليكو نتجاهل
والنطق كان بالحكم
تجديد 10 أيام
والأم ف المحكمه
تصرخ على الأحلام
يارب أنت القوى
وقادر على الحكام
كان الولد فى القفص
واقف ويتبسم
والضحكه طعنه اوى
بقلبك يا متحكم
وقالهم بس هقول كلمه
الظلم مابيتنصف
والحق بكرة يبان
يمكن أكون ف القفص
وعليا ميت سجان
لكن يقين بربنا
أنى مبتش جعان
وانى كمان انسان
وبكرة جاى أكيد
يحكم بعدل الله
ع اللى غدر وخان
وانتي كمان ياما
بس بلاش تبكى
اهى محنه وتعدى
والكل يوم يحكى
إنى صغير السن
لكنى معرف خوف
بكره عيونى تكون
مفتحه وبتشوف
ولاعمرى هعرف ندم
ولا حتى لحظه خوف
ـــــــــــــــــــــــــــــــــــــــــ
تـــــــامر النقـــــــيب من مؤلفاتى وليس منقولاً
