فى حب مصر بقلم / د. محسن الشرقاوى

د.محسن الشرقاوى

فى حب مصر :
إلى مصر .. وكل من عشقها .. وأحبها ..
إلى الحاقدين .. وكل من يحاول أن يكسر قلبها ..!!
هذه هى قصيدتى الرابعة : ....... اللى ناسى هى مين

4- اللى ناسى هى مين ..!!
ديه مصر ..!!

الظالم عليها .. وفاكر .. راح يقدر عليها ..
مين يقدر عليها .. الغالية .. مين يقدر عليها ..
اللى ناسى هيه مين .. يبص ف عينيها ..!!
التتار نهبوا وحرقوا .. كسحوا كل شئ قصادهم ..
جم لحد مصر وقفوا .. سلموا بعد عنادهم ..
مصر قالت أنتوا مين .. أهل مصر كسروا عودهم ..
هى دى مصر الأبية .. التاريخ كاتب خلودهم ..
الظالم عليها .. وفاكر .. راح يقدر عليها ..
مين يقدر عليها .. الغالية .. مين يقدر عليها ..!!
*********
حملات الصليبية .. فضلت رايحة جاية ..
طمعانة فى بلادنا ..
بس مين يرضى الأهانة .. ولا عار الأستكانة ..
أو عادى يمس حدودنا ..
أى حاقد ولا حاسد .. ناسى سر الشعب ده ..
ومد يقطف من ورودنا ..
هنوريه نار الحقيقة .. واللى مش شايفاه عينيه ..
هنوريه جرأة ولادنا ..
الظالم عليها .. وفاكر .. راح يقدر عليها ..
مين يقدر عليها .. الغالية .. مين يقدر عليها ..!!
********
مصر باقية .. ياللى مش شايفين خلودها ..
مصر شجرة .. فاردة ع العالم ورودها ..
مصر قلب بيروى غيره .. شريانها ووريدها ..
والرسول مابعده قول .. قال عليها أحلى كلام ..
خير جند فى رباط .. فى كفاح على الدوام ..
أدخلوها بسلام آمنين .. مصر السلام ..
الظالم عليها .. وفاكر .. راح يقدر عليها ..
مين يقدر عليها .. الغالية .. مين يقدر عليها ..!!
اللى ناسى هيه مين .. يبص ف عينيها ..
التاريخ والخلود والحضارة .. بين أيديها وبأيديها ..!!
ديه مصر ..!!
عالية مصر ..!!

د. محسن الشرقاوى

ومازال للحب بقية ..!!
ومازال للشعر بقية ..!!