اوراق مغشوشه
========== بقلم عونى هشام
لملمت اوراقى 
الحبر كان مغشوش 
وشفت فى ايامى
وجوه لابسة وشوش
-----------------------
الرسم تاه منى 
ما عرفت منه رتوش 
والفكر تاه عنى 
عايزله كام ملطوش
--------------------
حتى القلم عاصى
يكتب معايا حروف
من كتر ما بآسى 
شاف منى بعض الخوف
-------------------
خوفى على بكرا 
يصبح ماضى وذكرى
ونعيش تانى فى اوهام 
وعنينا ما بتشوف
------------------
شفت اللى فى الصورة
فى لعبة اسمها الكورة
الجد خدناه لعب
لعب بالارواح
يا خسارة ع اللى راح 
ولسه فى فاتورة
------------------
مين فينا يدفعها
الغدر كالسرطان
لازم نقطعها
ونعيش سوى بامان
---------------------
الصورة كات حلوة 
تاهت فيها الالوان
واللحن كان غنوة 
قلبنا شكلة احزان
---------------------
كله لحساب مين 
الدمع مالى العين
وان قلت كلمة حق
يقولوا مش انسان
-------------------
الدم غالى يا ناس 
عايزين ضمير حساس
نحاسب المسئول
ونعدل الموازين
---------------------
العدل يبقى اساس
مش بس ناس على ناس
الفاعل بقى مفعول 
ولا انتو مش عارفين
---------------------------
انا قلت ما عندى
بحروف ماليها الالم
اهو كله بيعدى
ولا حتى لحظة ندم
----------------------
وقت الحدث بصراح 
والكل كان مكلوب
يومين تشوف افراح 
والحال صبح مقلوب
---------------------
احداث فى بورسعيد 
لسه مفيش فاعل
انا بقول واعيد 
ولا حد متفاعل
اليوم نعيد كَرَه 
وعيشتنا بقت مُره
تصاريح هنا وهناك
قولولنا مين قاتل
----------------------
عايزين قصاص بالحق 
شبعنا منكوا كلام
مش كل كلمة لأ 
تقابلها لوم وملام
----------------------
عايزين قصاص عادل
وبلاش ميزان مغشوش
ايه بس لنا فاضل
غير وش ماله رتوش
============