**أنا الفقير ياوطن ** بقلم ابو اياد **

أنا الفقير ياوطن
وهو الفقر عيب
الفقر عمره ماكان فى يوم عيب
بس فقر الوطن هو دا العيب
لما الامال تبقى فى يوم عيب
لما حلم الفقير في يوم يكون عيب
لما الكبير ياكل حق الصغار
لما الفقير مش من حقه الامال
يبقى الفقر عيب
الفقر فى وطنا عيب
انك تشوف الفقير وتلف راسك عيب
لما تلاقى الطفل بتقتله دموعه
ولما تلاقى الام بتصرخ بأعلى الصوت من جوعه
يبقى الفقر عندنا عيب
لما تلاقى البيوت ادوار
ولما تلاقى ست مش لاقيه تولع نار
لما دموع الرجال تنهمر انهار
يبقى وطنا مستغطى بلحاف العيب
عيب ياوطن
عيب
عمر ماكان اكرامك للفقير عيب
لما تكسي الفقير فى الشتاء مش عيب
لماتداوى المرض مش عيب
لما تساعد بناتك ياوطن مش عيب
ولا حكايتك ياوطن بقت كلها فى العيب
خد منهم
خد من جيوبهم ياوطن
خسس كروشهم ياوطن
ماهو كل ده مش عيب
خد منهم وأعطى الفقير ياوطن
والله ماهو عيب
حق الولاد ياوطن فى بكره عمره ماكان عيب
حق الفقير فى الفكره عمره ماكان عيب
حق الامل فى بكره ليه يكون عيب
أعدل مابينا ياوطن وبلاش تقولنا عيب
قبل ماتقولى ياوطن حقى
فين انت ياوطن حق الفقير
ماهو عيب تقولى حقى وحقنا بقى عيب
ماهو ياوطن مش كل كلمة حق وراها كلمة عيب
حق الفقير فى الوطن
ياوطن عمره ماكان عيب
تحرم فقيرك ياوطن
م الوطن هو دا العيب