علمونا فى المدارس
ان الوطن شوية تُراب
ومن اليمين ومن الشمال فى بحرميه
أو بحر رمل
وحب الوطن يادوب مجرد كلمتين
نغنى بيهم فى الطابور
ونحي بيهم العلم
وشوية حماس على الكراسي وقت ماتش
أو منتخبنا يفوز بكاس
ياجي الشريط بالتهانى من الرئيس ومن الوزير ومن الغفير
ونشيد بلادى
وتحيا بلادى
ويعيش ولادى لما يجيبوا لبلادنا الكاس
وكان ده كله حب الوطن
نرقص نهيص
نرفع علمها فوق
ماهو العلم اكبر دليل انى بحبه الوطن
حتى ولو خاين عميل سارق بلادى
ماصص دم الغلابه ولادى
مش مهم
اصل الوطن علمونا انه مجرد كلمتين
فى نشيد بلادى
وفى تحية العلم
ولو فى يوم أعترضت
بقيت انا اللى كان بيهتف بلادى
متهم بهدم بلادى
ومتهم انى بدمر مستقبل بلدى واولادى
ماهو حب الوطن علمونا
انه مجرد كلمتين
وأن الوطن
حدوده ميه من اليمين ومن الشمال
وبره الحدود أنت غريب بلاوطن
وهتعيش غريب من غير تحية العلم
ماهو حب الوطن يادوب مجرد كلمتين نغنى بيهم جوا الطابور
ونشيد بلادى
وتحيا بلادى بالكلام وبالغنى
هتعيش بلادى بالكلام وبالغنى
هنبنى بلادى بالكلام وبالغنى
ونسيوا زمان جوه المدارس
وفى الطابور وقت الحماس
انه يقولى ان أمى لى وطن
وحضنها برده وطن
انه يقولوا حب الوطن من الايمان
حب الوطن عمل عباده
مش كلام
ومش غنوه تتقال باللسان
وان العمل حب وطن
وحب الوطن من الايمان
وان نجاحنا حب برده للوطن
وحدتنا برده عشق برده للوطن
ولما ابوك فى الفجر يسرح يزرع ويقلع
ده برده حب للوطن
ولما اخوك يصنع وينتج
ينجح ويبدع
دا كله حب فى الوطن
ليه بس خليتوا الوطن
حبة أغانى متكلفين
نغم وحروف مترتبيين
وان الوطن حبة كبير مالوش حدود
لابحر ميه ولامحيط رمال
حب الوطن له الف معنى والف شكل
حب الوطن دا فرض عين ومن الايمان
قالوا زمان ان المموه بيصنع رجال
طيب
اللى مالبس فى يوم مموه برده هو من الرجال
ولا ايه
حب الوطن دا حكر ليهم طب ما احنا بنعشق الوطن
حب الوطن يجرى فى عروقى
زى الدماء
خلايا بيضا
وخلايا حمرا
وخلايا عشق للوطن
حب الوطن مش غنوه تتقال فى الطابور
ولاكلمتين ولانسر مرسوم ع الصدور
حب الوطن يعنى الامل
يعنى العمل
نبنى نعمر
نزود نكبر
نفكر ونبدع
نزرع ونقلع
دا كله حب للوطن
حب الوطن ليه الف معنى والف صورة والف وصف
حب الوطن مش غنوه تتقال فى الطابور
حب الوطن من الايمان زى الصلاة
وهنتسال جوه القبور
عملنا ايه للوطن
دمرنا ليه بايدنا الوطن
وليه نسيننا اننا نبنى الوطن
ليه ماعلمنا ولادنا حب الوطن
