جارى التحميل
استخدم زر ESC أو رجوع للعودة
يا هلوطــــــــن
اشكثــر ..
بيك جروح تنزف
والحزن أســــّـــــــــــود !
كَضى إسنينه علينا الموت
بإيده السيف يتهـــــــدد
مثل ذيب البراري
الأمعط الأجــــــــــرد
إشكَد رادت ترده الزلم
بصدور المنايا
وكح ما يـنــــــــــــرّد
يا دمعات ...
أمي اليبسّاها الضيم
ويّ الكحل فوكَ الخد
ويا حزن الضفاير
نام عالـﭼرغــــــــــــد
ويا رمش الكحيله
الراح منّه الفرح غفله
وزاعل المـــــــروّد
ويا برنّو أبوي
المات بيه الفشكّ
بالشاجور من إسنين
ما تنعّــــــــــــد
ويا حصانه .. البرّاق
اليجمح ويَ الريح
مخنوكَ بصهيله
بسلسله إمحدد
ويا بستان أهلنا اليبسّه
جويريد ما ورد
ويا بلبل نخلنا السكّت
من الخوف ما غرد
ويا باب الإجانه الريح منّه
وجايب الطاعون ما ينسّد
ويا خبز اليتامى
إنباكَ منّا بليل وتفرهّد
عبر لينا الغريب
وداس فوكَ الحّد
ولبسنّا العار
حد إجتافنا وأزود
المصدر: ممدوح حنفي
