**الدم سايل ع الحيطان **بقــــلم تـــــامر النقيب**

الدم سايل ع الحيطان
بقــــلم تـــــامر النقيب
*****************
مش كفايه ولا إيــــه
الدم سايل ع الحيطان
والأرض شربت لما شبعت
وسمعت نبض الأرض يصرخ
دموعى نازله من عيونى
ودمكم على شقى يجرى
وهنرضى مين وازاى وليه
ده ربى علمان باللى صالح
واللى طالح واللى بيساعد ويوفى
واللى فاسد واللى شارى ومين جبان
مش كفايه ولا إيــــــــــه
الدم سايل ع الحيطان
جوه البيوت الدم ليه أصبح ملان
وبالشوارع والنجوع
جوه الكفور وبالضواحى
الثوره تصرخ م الكيان
يامصرى يابن النيل ياشهم
بالعدل والفكر اللى واعى
لازم تقوم تبنى الوطن
لازم تخلى من ضلوعك
للبلد جواك سكن
الغدر موجود بينا عارف
والفتنه طفحت بينا شايف
واللى بيقول الحقايق يسحلوه
لو تقول أنا أيوه حقى
هما يبقى الرد عادى إقتلوه
بس برضو حقنا أكيد هناخده
بالتحدى والصمود والارداه
لازم هناخده
ومش هنرجع وأنت لازم منا تسمع
اللى راح من قبل راح
وكله داس ع الجراح
واللى مات راح واندفن
بس عايش رغم عنك
حتى فى أخر الزمن
دم الشهيد اللى اتقتل
والظالم اللى عنه كمان غِفل
دم أخويا اللى اتقتل
وعرض اختى اللى اتهتك
ودمع امى اللى نزل
راح أجيب أنا حقهم
من اللى باعونا رخيص وضيعوه
مش كفايه ولا إيــه
الدم سايل ع الحيطان
والكل شاهد فى الميدان
لو حتى يوم قفلو الميدان
راح نبنى ميت مليون ميدان
لو قفلو يوم كل البيبان
الثوره ملهاش يوم بيبان
الثوره للى باع وخان
الثوره حقى وحقى ولدى
وحق أسماء اللى ماتت
وحسين ومينا وكل واحد
ضحى بروحه فى الميدان
هو انتو ليه عاوزينا عايشين كالبهايم
واللى مفتح برضو فينا يبقى نايم
واللى مش لاقى الكرامه
واللى مات م البرد ساكت
وبتبقو سدين الودان
مش كفايه الظلم خلانى جبان
والشعر برضو بكتبه وهو جبان
ومرايتى لما تبصلى بتقول جبان
انا مش جبان
انا بس خايف م الزمان
حكم مابينا اللى ما بيعرف ضمير
وخلى ليه الحق بينا ليه مهان
أنا مش جبان والثوره لازم تكتمل
والحق يرجع
وبثوره يتعدل الميزان
الدنيا مش دايمه لحد
والدمع مجراه العيون
ومكانه خد
والموت بيجى لكل واحد
وأسمع بقى داين تدان
والله ياللى فاكره دايمه
القيامه برضو قايمه
والثوره راح تفتح عيونها
ومش هترجع تانى نايمه
هنزل وأجيب حق الشهيد
رجع كرامتك من جديد
لحد إمتى نعيش عبيد
عايشين ومقطوع اللسان
نازل أنا جوه الميدان
أضرب رصاصك ف الملان
أضرب وخلى الدم سايل
فوق شقوق أرضك يابلدى
وبشوارعك وع المأذن والكنايس
وبكل شبر على الحيطان
عشتى يامصر
لوتروح روحى فداكى
الزرع لازم يتحصد
وكمان تموت كل الديدان
تامـــر النقـــــــيب ,,,, من مؤلفاتى وليس منقول