**بينك وبين أحلامك** بقلم شريف الرفاعي**

شريف الرفاعي

بينك وبين أحلامك
نص الرغيف العيش
وتعيش
لوعشت بين دراويش
يا فرحتك
انتا اللي قلت لدهشتك
من غيري انتي مفيش
برده اللي رامي ف سكتك
ميت عسكري وشاويش
وبقلك
لما تتطلع ف الشوارع
تايه بعد نص الليل
ابقى عدي ع الجوامع
خفف الدم التقيل
واحضر جنازة عزرائيل
لما ناب عن أبو السباع
يادي الضياع
**************
ثورة جياع
...مالية البطون
محض الشعاع
...سوء الظنون
قول للغصون سيبي الشجر
**************
ملعون
أنا المجنون
في حب ايزيس
وعشق امون
وأنا الهاوي
لشمس اتون
ياريت رمسيس
كلامه يهون
...
ويتساوي
بميت كلمة بيذكرها
معانا أصم
***********
سيوف للدم
بيعملها ولاد أيوب
وبص ياعم
يطول أيوب
ويتنازع ولاد ع الحكم
***********
مسكت كتابي م الأخر
وسبت عليَ
طول الرزق
أول كذبة مكتوبة
كانت ف الأصل
هيا الصدق