جارى التحميل
استخدم زر ESC أو رجوع للعودة
حدوتة عشق مصر الجميلة .. بقلم الشاعر المبدع / أحمد بيومي ..
رغم الشقى والناموس والطين ..
مستحيل تلاقي فلاح مسلم أو مسيحى ..
طالما مؤمن بربه..
في مصر الجميلة حزين ..
ومستحيل كمان تلاقي حد فيهم ..
يبات في يوم من غير طعام جعان ..
ومستحيل تلاقي فلاح صحيح البدن ..
جوه بيته سجين ..
والسبب في غاية البساطة ..
فلاح بلدنا عاشق للهواء ..
وريحة الزرع الأخضر في الغيطان ..
فلاح بلدنا المحروسة لو في يوم حب يقضّيها ..
يقضّيها لو بدقة أو شوية ملح وكمون ..
ولو زرته فجاءة ..
تلاقي عنده حتة جبنه قديمة ..
كان شايلها للزمان ..
وتلاقي عنده شوية لبن مع قشطة وبيضتين ..
من عنده أو حتى لو هدية من جيران ..
وتلاقي عنده راكية أو فرن أو كانون ..
والعه تملي فوق السطوح أو في الجرن ..
تخبز عليه أم العيال ليك أو ليهم كده رغفين ..
ويوم الموسم أو في العدين ..
اللحمه يا هديه ..
أو يدبح من البط أو من الفراخ جوزين ..
عاوز تعرف حد في الدنيا دي لسه عايش حر من غير هموم ..
روح زور حد من قرايبك في الفلاحين ..
راح تلاقيهم في الدوار أو على المسطبه قاعدين ..
والبنات بالشاي مع كيزان البطاطا والذره زي النجوم دايرين ..
والضحك عالي بيجلجل في الفضاء أ من وراء الببان ..
وحتى الشباب الجديد إللي أدمن الإنترنت والتليفون ..
فرادى أو جماعات ..
في الخلا مع نفسهم سارحين ..
المصري طيب قوي يا خال ..
والحكم في البيت يا إما شورى ..
يا غالباً للست المصرية الطيبة أم حسن وحسين ..
بس القرار بيقوله الراجل حدانا بلسانه ..
بس علشان يخزي العين ..
ملحوظه الكلام ده بس وصف للمصريين الطيبين ..
مليش دعوة أنا لا بالبلطجية أو خريجي الليمان والسجون ..
وتعيش يا ضحكة مصر ..
رغم حقد البعض والحاسدين ..
على طول الزمان في أمان ..
تغريدة عشق مصر الجميلة .. بقلم / أحمد بيومي .
