**ومضات‬ ديوان (رقصة الدراويش)**محمد أبو الفتوح**

‫#‏ومضات‬ ديوان (رقصة الدراويش)
~*~*~*~*~*~*~*~*~*~*~*~

ف زمان كلامنا يبان
ف زمان يتغطى
اللى نطق إنسان
و اللى انكتم وطى

~*~*~*~*~

غرَّقنى نورَك ف الحقيقه
شيِّلنى حمل مالوش مثيل
ف التُقل و الصبر الجميل
ألفين حقيقه ف الدقيقه
و ازاى اميل و انت الدليل؟!

~*~*~*~*~

صوتَك دار .. و غريب انا
داير سنين ف الريح

~*~*~*~*~

شوَّقنى شوقَك للوصول .. للوصول
صبَّرنى صبرك ع الظروف .. ع الظروف
وِدَّك يا وادد وِدِّنا .. وَدِّنا
خلَّى خيانة همِّنا .. همِّنا

~*~*~*~*~

يا سلام على المزاجات
الضحك و الأنَّات
بيستخبوا ف بعض
و ان جه زمان الوعد
تتفسَّر البدايات

~*~*~*~*~

صباح الحلم يطلع للسما
صباح الحب سارى ف الدِّما
صباح العافيه تسرى ف البَدَن
صباح الفُل ريحته منسِّمه

~*~*~*~*~

يا مصر يا امُّ الحيره .. أنا فيكى صاحب مِلْك
و لا غريب شحات .. حافى و ضاربنى السِّلْك ؟
أكونش ضمن الجيره ؟ .. تضيِّفينى شويه .. تستتقلينى أبات
و تكرمشيلى ف وشِّك لو مره جبت السيره
يا مصر يا امُّ الحيره

~*~*~*~*~

يا ليل .. آه .. يا ليل
أكون انا قنديل
و لاكونش انا .. أنا ديل
و لاكونش انا .. أنا طرف
موصول بجسم عليل

~*~*~*~*~

شَق الأدان السما .. فرَّع غصون رحمه
طرحت قلوب ساجده .. لخالق الملكوت
و ناس كتير سَحَبت .. نفسيها م الزحمه
ماشيين على شوقهم .. ناسيين مرارة القوت

~*~*~*~*~

إنتى اللى قلبِك ..
قلِّب الأحزان ف قلبى ..
قَلَبْها فرْح

~*~*~*~*~

يا عمر قلبى اللى انقضى
سلِّم لعشق الفضفضه
فضِّى مكان للجاى كده
و انت تلاقيه جه و ابتدى

~*~*~*~*~

شايف ملامحِك ف الملامح رايحه جايه
شارب هواكى لحد آخر حته فيَّه
كاتب قصايدى حبه فيكى و حبه منِّك
و شويه ائن لنفسى .. شويه ائنِّك
و ازاى راح انسى ؟! .. يا رب صبَّر

~*~*~*~*~

نبع الغرام سقانى منه كاس محبَّه
ياللى ماشيه .. ماشيه ليه ؟! .. إستنى حبَّه
و احنا نعمل عُقد لولى
منى حبَّه .. و منِّك انتى برضه حبَّه

~*~*~*~*~

قد اللى جواكى ف قلبى .. بس آه م المسافه
مش قادر اركب تاكسى و آجى
مش قادر اضرب نمره و اسمع
مش قادر ارجع
أنا كنت بحلم .. و لا انا دلوقتى بحلم ؟!

~*~*~*~*~

ورق الشجر عطشان
إرمى النَدَى يا فجر
إرمى يا فجر أمان
كل الليالى قَدْر

~*~*~*~*~

خَدنى اصطفاء الورد للكفين .. ندى
و شربنى جسم العاشق الولهان .. و طار
مابقاش يعلِّى الصوت .. أو يِعْتِل نِدا
راح دغرى ع الشبِّاك .. و غنَّى م القرار

~*~*~*~*~

الليل بيدخل يتسحَّب
فاكر هاخاف انا أو هاهرب
مش عارف انى جوَّايا
ألفين نهار بشموس طالَّه
لو شافهم الليل يتكهرب

~*~*~*~*~

صوتك يا (منشاوى) .. ع القلب طبطب حَن
علِّمنى معنى الفن
و الرسم عثمانى .. فوق الهوا سابح
رئيته بوْدانى
خشعوا له إنس و جن

~*~*~*~*~

صوت الجيتار ويا الفلوت هز السكوت
و فراشه طارت سرسبت ألوان على سطح البيوت
و ورده فوق قمة جبل هزت عروق الصخر و انتفضت حياه
لما عيونِك زغزغت قلبى اللى كان قرَّب يموت

~*~*~*~*~

يا عازل العُشَّاق
يا مفرَّق شمال و يمين
على شُونه نأبك طلع
أصل احنا متفقين

~*~*~*~*~

تختارنى و اختارك .. نمشى نقزقز لب
نتنسِّم النسمه .. نتقاسم الفكره
و ننوى نبقى نحب

~*~*~*~*~

لو كل زَهْر اترَمَى
جاب النعيم ويَّاه
ما كان دراع اتمَزَع
من شيل و لا من آه

~*~*~*~*~

الشمس آتون الحياه .. تشغى الشوارع بالبشر
كُلٌ يُطَارِدُ مُبْتَغَاه
البدر معراج السَمَر .. تعمَر قهاوى بالبَشَر
و الحب واصل منتهاه

~*~*~*~*~

حبِّك جناين فُل .. طارحه ف عز البرد
و الشمس سايبه الكل .. طارحه عليه الدفا
جامعه عليه العز .. و طارحه منى الزُل
حبِّك جناين فُل

~*~*~*~*~

سكك سالكه
و ماشيه تمِد بالتساهيل
ترابها يبارك الخِطوه
و يبقى ع الأثر زينه

~*~*~*~*~

حاجه غريبه
إنك تبدأ سيرة (ابو زيد) م التغريبه
و اما تشور (الجازيه) عليك
تجرى و تاخد رأى (دياب)

~*~*~*~*~

ما بين الآهه و الآهه بكتم آهه
و مش موجوع
آهاتى صوت أوتار قلبى
و فرحى دموع

~*~*~*~*~

كان يا ما كان من زمن .. عيِّل كبير السن
لا عمره مره حَجَل .. و لا مره غيَّر سن
و لا كانش دارى بإن .. أيامه فيه بتسن
-----------------------------------------------
محمد أبو الفتوح
لتحميل الديوان :
http://www.4shared.com/office/KJ2wL8gm/__online.html
~~~~~~~~~~~~~~~~~~~~~~~~~~~~~~~~~~~~
صفحتى الرسمية: https://www.facebook.com/aboelfotoh1