انا بحلم
،
انا بحلم اكون ربان
على سفينة والف بحور
،
كمان بحلم اكون فنان
اعبر بالشعور ف سطور
،
ونفسي الكون يسوده امان
واشوف الفقرا جوه قصور
،
ونفسي بجد ابقى كمان
حكيم عادل ماقولشي الزور
،
واشوف بعيوني كل مكان
زرع اخضر نسيم وزهور
،
ساعات بحلم اكون كروان
وساعات بحلم اكون عصفور
،
واكون تلميذ لبيب رهوان
واكون ظابط واكون مأمور
،
واكون طيار واكون قبطان
واعيش قانع ومش مغرور
،
واكون زلزال واكون بركان
واكون في الضلمة طاقة نور
،
واكون فارس من الشجعان
بقلب حديد بقلب جسور
،
واكون منهج واكون عنوان
لكلمة حق وسط نمور
،
واعيش مكسي ومش عريان
ويوم العرض اكون مستور
،
واحب وادوب واعيش هيمان
وليه الحلم فالواقع ياناس محظور
،
انا بالعند راح احلم اكيد علشان
لو بطلت احلامي هموت محسور
انا بحلم
صبري شومان
