أ بــــو عـــمـــــــا ر ا لـــمــــصـــــــــر ى " خليها ذكرى "

خليها ذكرى
............
لحد امتى
هتكونى قاسية ؟
و تنكرينى وعاملة ناسية
و انا لو عملت
نفس العمايل
تضيع حياتنا
بين التعالى
بين التحايل
خليكى فاكرة انك كبيرة
وانا برضه فاكر انى الكبير
لا تكونى تانى أجمل أميرة
ولا ف عيونك هاكون أمير
ويضيع غرامنا
كل اللى بيننا
راح يبقى ذكرى
والبعد زى الكبرياء
فى الحب دايما
بيبقى نـَكـِرة
وانت الرقيقة الطيبة
وحنينة وقريبة
طب ليه العناد ؟
والحب فايض
والشوق وغالب
طب فاضل ايه ؟
كلمة تقوليها
أو بس اسلم
ما انا اللى لفيت البلاد
ماشى بادور على قلب ضايع
والحب بيننا
كان .. أمر واقع
ليه تهربى واهرب معاكى
وافضل بشوقى
ويفيض حنينى
للمسة منك لو فى الخيال
معقولة يصبح حلم التلاقى
ما بين قلوبنا زى المحال ؟
كتير عليكى ...كتير عليا
دة انا كنت منك
وكنتى منى
والضحكة منك تداوى حزنى
فين هى راحت ؟
وأى قوة قدرت عليكى
جات واستباحت
حبى وحبك
قسيتى قلبك
ويااااااه ...يا قلبك
إزاى يهون
عليكى قلبك ؟
تجرّحينى ..و تجرحيه
أنا راضى منك
كل الجراح
واقول زمانى
بكرة يداويها
على إيه راح ابكى
ما الحب راح
ما بين عنادك
وعندى ليكى
كفاية قسوة
خلينا ننسى
حتى ان ما كانشى
بيننا رجوع
ما عادشى لازم
ننام ونصحى
تغرق قلوبنا
ما بين جراحنا
أو فى الدموع
خلاص نصيبنا
جبناه بإيدينا
خلى الحكاية
راضية السكوت
على ذكرى واحدة
بينى وبينك
كات صورة حلوة
عاشقاها عينك
سيبى الحكاية
من غير نهاية
بلاش تموت
.....
بــقـــلــــــم ا لـــشـــــا عــــــــر
أ بــــو عـــمـــــــا ر ا لـــمــــصـــــــــر ى