حسن المصرى " الاولة ف المنام "

الاولة ف المنام
زرت المقام وقريت الفاتحة للضريح
بوست ادين معرفتهاش
دخلت حلقة للذكر والتسابيح
ولد بيندة مدد حى
ونصبة وقاعدة كشك للدراويش
وصحيت من النوم قافل قبضة اديا على مفيش
...........................................................
والتانية ف المنام
عود بخور للسيدة
وندر لاولع القنديل
واعلق المنديل
وافقر لحد الشخير
فرشت الحصير لسيدى المقام
وعيال لابسة طراطير
حاطة طوب وحصو صغير ف مناديل
بتجرى حوالين المقام
وانا لسة بكمل حلمى ف المنام
...........................................................
والتالتة ف المنام
قاعد ف وسط الحضرة
ماسك ديك وجوزين حمام
الديك مكتوم الادان
العرف احمر ف لون دمة
معدش بيكاكى
خلاص مستنى دبحة
........................................
الرابعة ف المنام
ماشى ف شارع الاحلام
رجليا مرغوزة ف الطينة
والمطرة بتغطى ف العرا اجسام
طفل لسة مولود
صوتة.....بيسمع كل الوجود
بيرضع صوابعة
ماسك ف ايدة الامل
بيمد دراعاتة بتخطى كل الحدود
.....................................................
الخامسة ف المنام
ناس بتجرى
والدنيا ضلمة
متكحلة بالعتمة
بنت صغيرة تايهة من امها ف الزحمة
تصرخ باعلى الصرخة
ندهتها رجت كل الدروب والقلوب
تبكى تقول اة يا مة
البنت وقعت ما بين رجلين
وشها بقى مرسوم بلون الجزم على الخدين
عربية ...معرفتش طولها كام متر
ماركة احدث موديل
جات عندها وفرملت
نزل صاحبها البية ونظرة غرابة مليا عنية
شخط فيها ونطر
والبنت بتافاف
جسمها متغطى بالمطر
قالها مش تحاسبى
كنتى هتخبطى العربية
يا جاهلة يا غبية
قامت البنت الصبية
وركنت جنب حيطة
وقالتلة كتر خيرك
وقفت بعربيتك.. حشت الاقدام عنى
الناس كانت خلاص....قربت تقتلنى
بصلها تانى بغرابة وقالها بشخطة
روحى لحالك............ بالسلامة
والناس راح تجرى من تانى على اى سكة
عتمة والا ضلمة
المهم انها تكون نافدة من تانى لسكة
................................................................
حسن المصرى