سيجال #مش_مهتم بين الشاعرة الأستاذة ولاء عدنان و الأستاذ مصطفى تيسير و الشاعر القدير الأستاذ مجدي عامر و الأستاذ الشاعر القدير عوني هشام و الأستاذ الفنان .. ماجد زهير .. تحياتي لأبداعكم الدائم
..
#ولاء_عدنان
..
مابـيهتــمـش أبــداً بـيــــا..
وفضل كل آصحابه عليا..
يزعل منى لــو آهملته..
ولا بعِدت آنا عنه شويه..
..
فاكر إن الدنيا دى عنده..
وإن وسامته معاه بتسانده..
وناسى إن الناس بالناس..
مش بغرور تفكيره وعِنده..
..
آبوه آنا بشكى لكن من يآسى..
آصل عليا بتصعب نفسى..
يعنى غرامى قصاده آسيه..
وآنا راح آقسى كمان من نِفسى..
..
بس إزاى ماهو برضه حبيبى..
لما بشوفه يهون تعذيبى..
لو فكرت أكدب وألاعبه..
مش هاتعدى عليه ألاعيبى..
..
حد يقوله الحب وداد..
لا تحدى ولا غرور وعناد..
ليه بنـــقرب حبــه بحبــــه..
وبيحكمنا زعــل وبعـــــــاد..
..
شوفوا حبيبى مش مهتم..
بيــا ومـــشيـــلنى الهـــــم..
بس بيلمح زعلى ف عينى..
يقوللى إنت حبيبـــى ياعم..
..
آنا من حقى آقع فى غرامه..
بياكل عقلى بحلو كـــلامه..
بس آشوفه آتلخبط جداً..
وآنسى آى خصام قدامه..
..
هـــو كـــــمان عاشق فنان..
عايش إللحظه بكل جنان..
دايماً وخــداه النجـــوميـــه..
وآما أعاتبه يقول غلباااان..
..
#مصطفى_تيسير
..
لا بهتم .. لا بهتم ..
إسألي كل قصايدي تقولك ..
لا مش لازم يعني أقولك ..
أنا عاشقك علي بعضك كلك ..
ف غرامك أنا شايف ذولك ..
و أما أقول وحشاني عيونك ..
إنتي قوام بتقولي إتلم ..
و أمشي قوام و راكبني الهم ..
صح بتصعب نفسي عليا ..
وحدي و كل الناس حوليا ..
لما أتكلم بس شوية ..
و إنتي بتتقلي و مفيش دم ..
و الله أنا عمري م أكون مغرور ..
دا بتمني أجيكي و أزور ..
و أكتب أسمك ف الدستور ..
من غير م أسأل كام و كم ..
أصلك روحي ..
روحي معاكي منين متروحي ..
كلمة تهون كل جروحي ..
و بيتشال من قلبي الغم ..
أه غلبان و النبي غلبان ..
شوفي حروفي ف كل مكان ..
تعرفي إني صايبني جنان ..
بتنطق إسمك .. أقول كتاكيت ..
كل دا يعني عشان حبيت ..
نفسي أجيكي لحد البيت ..
و أطلب أقابل الخال و العم ..
عرفتي خلاص إن أنا مهتم ؟
أنا مهتم .. أنا مهتم .. أنا مهتم ..
..
#ولاء_عدنان
..
يعنى زعلت عشان بشكيك..؟
بعد ماكنت المجنى عليا..
آصبحت إنت المجنى عليك..
طب خد عندك..
آنا مش هاقبل تانى بعِندك..
ولا هاتنيل آفكر فيك..
يعنى عملت زعلنا قضيه..
علشان بس بقول إهتم..
طيب آقول للناس دلوقتى..
كنت بقولك ليه إتلم..؟
خلى بقى الطابق مستور..
وإوعى تعيش على قلبى الدور..
ولا كتاكيت ولا حتى فراخ..
قال وبقول ياحرام معذور..
خلينى ساكته وكاتمه مرارى..
وزود بالإهمال كده نارى..
وإنت خليك مش مهتم..
وقول للناس إنى مفيش دم..
آل غلبااااان..
وآعمل أيه ف قلبى التعبان..
اللى ماطايل غير الهم..
آل مهتم..
..
#مصطفى_تيسير
..
قولي برحتك .. إشكي برحتك ..
شوفي حبيبتي فين مصلحتك ..
قولي ظلمتك .. قولي جرحتك ..
قولي إن أنا عمري ما ريحتك ..
خلي غسيلنا كدا منشور ..
زي الشمس ف عز النور ..
كدا هوه قصاد الناس مبلول ..
عايزة أقول ؟
ماشي هقول ..
كل بنات العالم تحلم ..
نظرة عيني بس تنول ..
و أنا علشان غلبان و الله ..
كدا مكسوف و تملي خجول ..
برفض حتي أتكلم كلمة ..
بكتب جرحي ف الكشكول ..
و إنتي تقولي حبيبي إتلم ؟
أما صراحة معنديش دم ..
لو أتكلم تاني وياكي ..
و لا أعيش الحب معاكي ..
شوفت ف حبك نار يا ملاكي ..
شلت عشانك و الله الهم ..
..
#ولاء_عدنان
..
طب خد بالك..
إنى زهقت طهقت خلاص..
يعنى كمان ماحناش عاجبينك..؟
ولا مفيش عندك إحساس..!
كلمه وطلعت قولت إهتم..
روحت شكيتنى لكل الناس..
لأ بقى حاسب..
مين ع الليله دى بقى هايحاسب..
كل عتابك رصيته رص..
وآنا ولا كلمه وبسكت هُس..
وآنا مش عايزه آقول وأتكلم..
إن عنيك زايغه وبتبص..
لم الليله..
مش عايزيين نعمل هُليله..
نفضح روحنا آكتر م إللازم..
بعد ماكت قصتنا جميله..
عصبتنى وده بقى يكفينى..؟
بس أقل كلام يرضينى..
يلا صالحنى بقى وهدينى..
وهاتلى عروسه إللى بتتكلم..
مهما عملت هاتيجى مسِلم..
وأنا راح أسامحك..
بس ياريت ماتزعلنيش..
ويكون قلبك برضه إتعلم..
..
#مصطفى_تيسير
..
يعني تقولي عيوني زايغين ؟
طب بصيت أنا بس لمين ؟
هما يدوب كانوا كدا بنتين ..
مايا و داليا هناء و شرين ..
كانوا ف سحر عيوني دايبين ..
أعمل إيه والله مسكين ..
و إنتي طبيخك زي الطين ..
أشكي لمين و لا أحكي لمين ؟
كل ما أقولك تعملي كوسة ..
تحتاسي حوسة ..
و أما أتنرفز و لا أزعق ..
بتصلحيني بحضن و بوسة ..
جبت عروسه .. جبت عروسة ..
و جبت هدايا و كام دبدوب ..
و إنتي تقولي إيه المطلوب ..
إصحي و فوقي ..
روحي ع المطبخ نقي و دوقي ..
جردل مية إتكب أنا فوقي ..
و أنا من زوقي ..
مش بتكلم ..
بس خلاص أنا جايب أخري ..
ورحي إتاخري ..
و لا أقولك تيجي نتصالح ..
أصلي أنا عاشق رمشك جارح ..
يلا خلاص ننسي إللي يزعل ..
ونعيش بكرة كأنه إمبارح ..
#Magdi Farag Amer
قصيدة ( الجار إللي فوق )
الشاعر / مجدي فرج عامر
أنا الجار إللي فوق
ياناس كمل وذوق
سواق أنا في المرافق
وطول اليوم بسوق
الليله صوتكوا عالي
نفسي شوية هدوء
والنوم ولا حتي جالي
إزاي حارتاح وأروق
حتي مذاكره عيالي
دا كأني ف وسط سوق
والله شغلتوااااااا بالي
ومراتك صوتها عالي
وكأنه ف ودني بوق
جراااا إيه إيه الحكايه
ليه فرشالك ملايه
دي كانت ست عاقله
بيقولو عليها آيه
متزودوش خلافكو
وكل حد شافكو
راح ياخد فكره وحشه
ويلعنوا ف خلفكوا
أنا حاأنده أم بطه
دا أبنها دنجل وشطه
وحجيب جاركم قناوي
خليك ع الصلح ناوي
وتبقي آخر غلطه
حااعمل ساحر وحاوي
وبالكلام حداوي
عاوزك توطي صوتك
زي مراتك ما شارطه
صلي علي إللي يشفع
والصوت ما حد يرفع
قولوا أيه الحكايه
واحنا معاكم بنسمع
ليه تنزل فيها تلبيخ
علشان ملقتش طبيخ
سيب لها مصروف بحبحها
وأفرد إيدك لحلحها
وبأحلا كلام دلعها
جيب لها فاكهه وبطيخ
نحمد ربنا حلينا
وقرينا الفاتحه وجينا
وخلاص الدنيا أحلوت
ولعدش أصوات بتجينا
دلوقت حانام وأطمن
بيذاكروا عيالي حوالينا
فيها ناس احولها تجنن
والستر يارب علينا .
#مصطفى_تيسير
أنا جارنا تملي رايق ..
لو حتي تقوم حرايق ..
ألقاه فرحان بيضحك ..
و منفض للخلايق ..
لو يوم يسمع صوات ..
بيعلي السماعات ..
يفضل يسمع أغاني ..
لو حتي الكل مات ..
مقابله من دقايق ..
أستاذنا أصله عايق ..
بيقزقز لب أبيض ..
مروق أه و فايق ..
أستاذ و الأصل شاعر ..
و بيفهم ف المشاعر ..
و بيلعب بالحروف ..
فنان و طريقو واعر ..
إمبارح كان معانا ..
و قالي إسمع أمانه ..
خلافتكم تبقي بنكم ..
ميسمعش بيها جار ..
و سابني قوام و طار ..
أنا قولت أسمع كلامه ..
حكم البيوت أسرار ..
#عوني هشام شاعر واعلامى
شوفى يا بنتى وانت يا واد --- شفت حواركم كله عناد -- اصلها بنتى وانا عارفها --- شوية شوية عليك تعتاد --- وانت يا ابنى اسمع منى -- فوت مرة وامسك مرة --- دايما اشوفك وتطمنى --اصل عناد الزوج والزوجة عمره ما جاب الخير بالمرة --- شوية غرام وحنان وحاجات ---- ممكن برضة بعض نكات --- مع كام كلمة ولمسة ايد --- هاتنسى الهم تعيش فى نبات ---- وانتى يا بنتى شوية شوية ---- مصطفى ابنى وغالى عاليا ---- بلاش الواحده بواحده ونص --- هاتكونى راضة وعيشة هنية ---- وابقوا تعالوا هنا فى زياره --- تغيروا جو تشوفوا الحارة -- هاترجعوا تانى كما العرسان --- وكفاية صياح وعمايل غارة ---- اصل الناس بتشوف الناس --- خلوا شوية فيه احساس --- ده بيذاكر وده مش فاكر --- الا عراكوا ملهوش اساس --- قلت كلامى وخلص القول ---- وانتوا عليكوا المفعول --- اهدوا شوية العمر معاكم --- هاتهدى الدنيا وفيها هتنول --- كل احلامك انت وهيا ---- وانتوا لنفسى ضى عينيه -- نفسى تكونوا من الصالحين ---- وانت وهيا الحق عليا --- خلاص يا ولاد----
#ماجد زهير
انا جاركم قناوى ندانى الاوسطه الزوق
لما لقى صوتكم عالى وصاحبنا كده مخنوق
هنصلى على الحبيب والدنيا بذكره تروق
انا عرفت الحكايه وانا نايم فشقتى فوق
انا سمعتها بتقولك عاوزاك بيا تهتم
و غلطها لما قالت انك معندكش دم
بس هى معاها الحق لما قالتلك اتلم
مهو انت يا اخى كلامك اكيد ركبها الغم
فرحانلى اوى بشابك وبتقول انا قدى مين
وفالحريم بتلاغى بامارة هناء وشرين
ياخى إعدل وصون مقامك خلينا بقا ساكتين
يا حبيبى عاوزينك طيب ونكون بيك مبسوطين
وانتى ياللى زى بنتى جوزك زينة الرجال
بامارة ايه يتلم وانتى بالنسبله حلال
يعنى عاوزه يروح بره ويتغير بيكى الحال
هتصبح عيشتك ويل لاينفع عم ولا خال
اهتمى شويه بنفسك وبلاش شغل بنات حوه
جوزك لو يزهق منك على طول هيبص لبره
وعلى سهوه تلاقيه جايلك وماسك فايده ضوره
اسمعى لنصيحة عمك وقوليله دى اخر مره
اطبخيله واكله زين واوعى يطلع كده مالح
اعملى الطبيخ صنفين وخالى السمن سايح
علشان يكون سبع متين وعلى شغله يقوم رايح
وبكرامة طه الزين يكفيكو شر الفضايح
#عوني هشام شاعر واعلامى
عونى . ولاء مصطفى مع مجدى -- عملوا حوار فيه فكر بيجى -- فيه افكر وكمان عبارات -- شرحت نفسى وكمان وجدى --- اصل دى حاله كتير بنعيشها --- فيها الغاز نقدر نفتشها ---- وفيها مواقف حلوة كتير --- والقفشات برضة بنهرشها --- بس حقيقى حقيقى جنان ---- رجع الماضى كأنا زمان --- قصة ستى وقت النوم --- وفى حضنها بنعيش بامان ---- الله عليكى يا ولاء بنتى ---- وانت يا درش كنت سفينتى ---- مشينا معاكم ومن غير عوم --- لا شفنا امواج ولا حتى غيوم --- زى الحلم الحلم فى ورد جنينتى -- وانت يا يا مجدى يا ابو الاشعار --- ادام حرفك انا باحتار --- كأنك ساحر وانا مسحور --- لا فى اراده ولا باختار --- اما انا عبد فقير غلبان --- بحبكم حب بكل جنان --- ودى حدوته فيها كتير --- وعبرة لجميع العرسان =====
#مصطفى_تيسير
لو هتكلم راح أقول إيه ..
بص يا باشا .. بص يا بيه ..
أصل حياتي عيشها مرار ..
ليل و بعيشه ناقصله نهار ..
أدخل بيتي ألقها خرجت ..
قال إيه راحت للجزار ..
و ألقها راجعة و جايبة خضار ..
و أما أتكلم تلويلي بوزها ..
قدري و بختي إني أكون جوزها ..
طيب إحكم بس ما بينا ..
طول اليوم شغاله ف هات ..
خلت جيبي يا ناس شحات ..
العيال عايزين غيارات ..
و السخان عايز يتصلح ..
و الراديو عايز حجارات ..
و الواد عبده عايز شرابات ..
هي جابت ف إشربات ..
قلبي تعب من قوله هات ..
لو هتكلم راح أقول إيه ..
قولي يا باشا قولي يا بيه ..
عوني هشام شاعر واعلامى
انت العاقل راجل البيت --- مهما تغرب رحت وجيت --- والستات عايز تتدلع -- مهما تخبى او رديت ---- بس بحكمة عقلك يا بنى --- وكله بعشرة مع الايام --- تاخد تدى لازم تبنى ---- اياك تدخل فى الاوهام --- اصل حياتنا فيها كتير ---- وكله اهو عايش غنى وفقير --- تمسك نفسك تحكم عقلك --- كل الناس هاتقول دا كبير ---- كل شوية طول بالك ---- انت اصيل وابو زيد خالك --- انت معاك بنتى الامورة --- وانا راح اشوفها ووضبهالك --- انسى خلاص الحق عليا--- انت كمان بتزيدها شوية --- شوية عليك وشوية عليها --- --- روح لها بس بشوق وعاتبها ---- هتلاقى حبك بان فى عنيها --- مستنى ايه روح
#مصطفى_تيسير
بعد كلامك ممكن أقول ؟
مش معقول.. مش معقول..
و الله كلامك كله أصول ..
أنا غلطان و أنا المسئول ..
هو أنا يعني كنت أطول ..
يبقالي حضن و لمة و عيلة ..
يبقالي بيت و عروسة جميلة ..
و عيال حوليا بتعمل هوليله ..
و أنا بحكلهم كل حكاوي أم الغول ..
أنا غلطان و الحق عليا ..
بس أعزرني أنا واد شقيان ..
طالع عيني يا ناس عرقان ..
برجع بيتي يا بيه مقتول ..
مش راح أعاتب تاني عليها ..
علشان طلعت بنت أصول ..
