جارى التحميل
استخدم زر ESC أو رجوع للعودة
مش مكسوفين ؟؟
مش مكسوفين تعلقوا على صورتى وكأنكم بهوات
والله دا اللى ناقصكم تحاسبونا ع الهفوات
طب حد منكم جدع يرمي لى ولو لقمة
وانا من امبارح بطنى بتتقطع من سُكات
عارفين أنا واخت هنا من كام سنه من عمرنا ؟؟؟
من قبل مانتولد بشهور
دايس قطر الغلابه على رقابينا واحنا يااادوبك موت
عشان نعيش وسطيكم ..أطفال ولاد بشوات
قطر الغلابة قطّعنا ورمانا هنا بالذات
لا حصّلنا ولا فُقرا ولا حصلنا ولاد بهوات
لكن الجوع مكفّرنا وأكلنا م الفضلات
.....................
احنا ياخلق ماحناش زى صوركم الماسخة
احنا ف الحقيقة ربنا خلانا ولاد تسعة
لكن تقول إيه على أب مش لاقي
ولا أُمنا كمان قادرة
شوف مرمطونا ازاي وسيرتنا بقت .... بشعة
..........................
ولاد شوارع نعم لأننا ضاليين
لكن سألتكم من زمن ....... (حضراتكوا تبقوا مين ؟)
انتم السبب ياخلق اللى احنا وغيرنا فيه
مليتوا كروشكم الواسعة وخليتم زيينا ملايين
ودلوقت ف الصورة بتتعاجبوا عللى زيينا
والله ياربنا لافقرنا ولا احنا كان للزمن حيلة
.......................
الذنب ع اللى افترا من خلقك كتير زيينا
يااااربنا .... باسألك ؟
هو يوم القيامة ياربى ح نكون كدا مع بعضينا ؟
والا ياربنا احنا مش ح نتحاسب مع اللى دابحينا ؟
............................
أمانه ياربنا تنصفنا وتسترنا
ولا يوم ف الدنيا تحوجنا لعبيدك
احسن عبيدك يارب ظالمنّا
واحنا والله ياااربنا بنحبك
ولا يوم من أيامك ياربنا ح نسيبك
ولا يوم من أيامك ياربنا ح نسيبك
ولا يوم من أيامك ياربنا ح نسيبك
......................................................
.......................................................
كلمات وشعر عامية من تأليف مصطفى الجابرى
