انا اللى سنى كبر والقلب ما كبرشى .بقلم محمد اسماعيل

أنا اللى سنى كبر
والقلب مكبرشى

بحلم بكورة كفر
وأنفخ متنفخشى
وأركب على المراجيح
يلطش فى وشى الريح
وعينيا م الضحكة
تقفل ومتبانشى

وأصحابى حواليا
سامع صدى صوتهم
إااانزل
فا منزلشى
أنا اللى سنى كبر
والقلب ما كبرشى ,,,

بحلم بعجلة تروس
مطرح ماكون بتدوس
فى الرمل ماغرزشى
وأديها لفة ل ده
ول ده مينفعشى
أنا اللى سنى كبر
والقلب ما كبرشى ,,,

بحلم أكون بقال
عشان أجيب شيبسى
وآكل على راحتى
جيلى كولا وكرانشى
وأحبس بقى ب بيبسى
وأنفخ بقى ف كرشى
أنا اللى سنى كبر
والقلب ما كبرشى ,,,

بحلم أكون طيار
لما بشوف السما
وأحلم أكون ظابط
وأقبض على الأشرار
ماسك مسدس خشب
وأضرب ب بوئى النار
وأقول لصاحبى موت
وهو ما يموتشى
وأقفش عشان مرضيش
وأمشى و ما العبشى

انا اللى سنى كبر
والقلب ما كبرشى ...