{لو تسمحى يادنيتى} قصيده لبنت الريف الشاعره أم علاء

ام علاء

,,,,,,,,,لــو تسمحـــى يـا دنيتـــــى ــــــــلبنت الــــــــريـــــف

لو تسمحى يا دنيتى
أسرح معاكى بفكرتى
والأعبك وأجننك
إنتى ياما مجنانى
أنا إنسان
شعور وكيان
عرفت مكانى
مش هأتنازل عنه تانى
عاوزة الفرح يسابقنى
وأعدى منه وأجرى
وأكون الفائز الأولانى
لما يقابلنى
ويحب يعاتبنى
أقوله سيبنى
أفرح مرة واحده
ولو ثوانى
هأتعلم أحب روحى
أنا طول عمرى أضحى
هأجرب ولو مرة
أكون فيها أنانى
ليه أظلم زمانى
وأقول هو إل زمانى
ما هو غصب عنى
أخدوا منى مكانى
هأروق وأفوق
واقول تعالى يا شوق
لو حتى حلاوة روح
لحظة وإنسانى
صعب إنك تعيش
فى عالم ميساويش
خد منه إل يرضيك
وبلاش تعانى
خليك عندليب
وغنى راجعين
للحب تانى
ونادى يا طبيب
جرحى داوانى
طول ما فيه حبيب
من قلبى قريب
ورايا الحزن هأرميه
واكون نفسى وكيانى
يا قلبى عيش وإتهنى
ولحبيبك إتمنى
حتى لو كان بعيد عنا
دوق طعم حنانى
إسمع عبدالوهاب بيغنى
عشق الروح مالوش آخر
لكن عشق الجسد فانى