شعر/ اشرف حنفى على * * وردايه اِنتى على خد الوجود * *

* وردايه اِنتى على خد الوجود *
قدرى أعشق حروفك حبيبتى .. ويكون نداكى هو كلمتى وصمتى .. طابع فى وجدانى تفاصيل ملامحك .. فى حزنى حبيبتى انتى دمعى ، ويوم عيدى هو : لحظة ما تتبسم شفايفك.. وطنى فى غربتى اِنتى .. واِنتى خطوتى لما : لما أعود * عطشان اِليكى حبيبتى .. اروينى من نهر الحنان .. منايا تقولى بحبك ِ، علشان أصالح بيها الزمان .. مش كلمه هى أو مجرد حروف .. دى زادى اللى عايش عليه .. هى اللى جاى واللى كان .. دى دنيا الأمانى حبيبتى .. أملكها حبيبتى بنظره من عنيكى السود * بحب فيكى حبيبتى : نقاء الطفوله .. بحب فيكى نسمة الفجر الخجوله .. بحب فيكى اِبتسامة أمل .. بحبك همسه تمحى منى كل الملل .. بحبك روح بتحضنى حاضر وغايب .. بحبك قلب صاين ليا كل العهود * حاسس بيكى حبيبتى ولو كنتى فين .. روحى دايبه فى روحك ، لو بينا ملايين السنين .. أشواقنا تقربنا ياعمرى ، عمرها ماتعرف سور أو حدود * صوتك حبيبتى بيسرى فى وجدانى نغم .. حروف نابض بيها فؤادى تتحدى العدم .. أنا ليا مين غيرك ياعمرى : فاتح له أحضان حنانى ؟ .. لو قلبك فاكرنى ياعمرى .. أو حتى نسانى .. أو حتى كان سهام من وهم وصدود * حكايتنا ياحبى : مش حكاية اتنين عاشقين .. اِحنا ياقلبى روحين دايبين فى كيان من حنين .. فى البعد حبيبتى ذراتنا بتتعانق .. ِمش محتاجين للتلاقى ، أو حتى لمسة اِيدين .. لغانا من غير حروف .. لغانا ف دمنا اِحساس ، يتحدى كل الظروف .. حروف من شوق دايما بتجمعنا .. همسات بتحيى أرواحنا .. ومين يقدر حبيبتى يسمعنا ؟ .. هوانا حبيبتى ملوش أبدا نهايه .. علشان مكتوب بالنور .. بحروف الخلود * تتبدل الأزمان .. يتغير الاِنسان .. حبك دايما حبيبتى : أقوى من النسيان .. أقوى منى ومنكِ ، من كل اِنس وجان .. حبكِ حقيقتى الوحيده .. هو عنوان كيانى ، هو ذاتى الوليده .. حبيبتى ورده من نبع الصفا اِنتى .. عبيرها فاض ع الوجود * *(شعر/ اشرف حنفى على)* ********************************