{حلم خايف} قصيده للشاعرحسن هادى الشمرى

حلـــــــــــــــــم خـــــــــــــــايف

حسن هادي الشمري

05/10/2011

يا عـــــراق ...

ليش أيامك حزينه

وبيك حزن اليوم

يشبه حزن أمس

يمته تنزع ثوب حزنك

تمسح دموع اليتامى

وتلبس اثياب العرس

أمس ...

ﭽـنا ازغار نحلم

نلعب ابفي الصرايف

وﭽـنا حتى أيامنا

انحس بيها ميته

والحلم بعيونا أنحس بيه

خايف

الفرح ما يوم دﮒ بيبانا

ولا غفت بسمة على

على أحضان الشفايف

يا عراق ...ليش حزن اليوم

يشبه حزن أمس

حتى من ﭽـنا نسولف

ﭽـانت أحـﭽـاياتنا أنحس بيها

خرسه

نحـﭽـي بسكّوت بهمس

بالمدارس ...

من كتبنا أسمك على أرواق الدفاتر

ﭽـانت أقلام الرصاص تخاف تكتب

والدفاتر ماتت الأوراق بيها

وما تحس

ومرت أيامك حزينه

ورغم كل الموت بيك أحنا كبرنا

وكبرت ويانا السوالف

وظلت أتدور الفناجين بـﮕـهوتك

بالمضايف

ومن صعدنا أعلى المشانق

مثل نخلك احنا متنا

والنخل تدريه من إيموت

واﮔـف

يا عراق ...ليش حزن اليوم

يشبه حزن أمس

ورادوا ايسوون يومك

كله ليل

ﮔـمنا صرنا أشموع ضوينا

بسماواتك شمس

ورادوا ايفرغون منا أفكارنا

وانت تدرينا ....

مثل ناعور إحنا

إشما يفرغونه يرد إيدور

يحضن ماي شطه وينترس

يمته تنزع ثوب حزنك

يا عــــــــراق

وتلبس ثياب العـــــــــــرس

وتلبس ثياب العــــــــــــرس