قيصدة {لا سلام ولا سؤال} الشاعره أشجان سليمان

لا سلام ولا سؤال ... 8
كلماتي : اشجان سليمان
--------------------------
العدل فين ياخال
اوعي تقول العدل
في الميزان
قبة الميزان مكسورة
والحقوق مهدورة
وبهية حزينة ياخال
وانت عارف الحال
من يوم ابنها
ما لفوه بالعلم
وقالوا دا شهيد ياولداه
اياك تقول قدر مكتوب
والا تقول ايه اللي وداه
اللي وداه حب البلد ياخال
راح يطالب بالعدل في الميزان
رصاصة والتانية
مات في الحال
وشالوه اصحابه
علي أكتافهم
لا اله الا الله
لا حول ولا قوة الا بالله
مات الجدع
وفِـ ايده غصن زيتون
كان بيحلم
كان بيعشق
ترابك يابلد
كان مستعد
يموت الف مرة
حبه ليك فاق الحد
أخاف أموت
يقابلني هناك
ويسألني :
أخدتم بحقي والا لأ
هاقوله ضاعت الحقوق
جوه شقوق الارض
اللي إتروت
بدمك يا ولد
والا أقوله ايه يابلد
اه يابلد .. اه يابلد
كان لسه فيه امل
ابنك مش شهيد
ابنك قتيل
ابنك إنجلد
العدل مات وِالولد مات
اتخنق .. اتشنق
باسم العدالة يا بلد ...!!