جارى التحميل
استخدم زر ESC أو رجوع للعودة
قصيدة{بلد العجايب}
آه وآه منك يابلدى
فيكى م العجب ألوان
اللى قتل فيكى برئ
والبرئ فيكى مُدان
واللى ينهب تحضنيه
فيكى يعيش متصان
واللى خان شعبك وارضك
دا اللى ليه كاس الحنان
واللى دمر حلم ولدك
واللى عاب فيكى الادان
واللى يغدر واللى يمكر
والخسيس ويا الجبان
هما دول ناسك واهلك
واللى يستاهلو الامان
أما اللى صانك واللى حبك
دا ملوش فيكى مكان
اللى هانت روحه لجلك
اللى كان بيته الميدان
واللى يروى بدمه ارضك
واللى عمرو ف يوم م خان
واللى عاش يابلدى عرقه
يروى زرعك والغيطان
واللى بيحبك بعلمه
ينورك طول الزمان
واللى عاش يبنى قصور
وبيته من أربع حيطان
دول يابلدى عاشو فيكى
داقو مرك والهوان
دول تمنهم كان رصاصه
او رميه ورا القضبان
ناس كتير قالولى اسكت
دا الحيطان ليها ودان
قلت بلدى ثم بلدى
حتى لو قطعو اللسان
وآه وآه منك يابلدى
فيكى م العجب الوان
الشاعر.أحمد حسانين
