بقلم ا لشـا عر / أ بـو عـما ر ا لمصـرى (( تــحـــيا مــصـــــر ))

تـــحـــــيا مــصـــــــر
رُفـِعـَت الجلسة
دُفـِنـَت الثورة 
وتحيا مصر
مش جناية انك تحاكمى الشقيانين
مش خيانة انى ابقى ميت بالرصاص
والقى إسمى 
فى كـُشوف المعدومين
.مش غريبة يا مصر
أهتـِف لك بعـُمرى
يبقى دمّـى سلاح 
فى إيد اللى قتلنى 
يبقى لحمى دليل إدانة ع الطريق
والرصاصة اللى فى قلبى
ساكنة جوفى 
بريئة جداً
والقاتل يطلع برئ
مستـَنـِّى إعدامى فى قبرى 
تحيا مصر
انتِ غير كل البلاد
ماشية بضَهرِك للهلاك
مِـسـافرة وف نفس المعاد
لطريق يقطَّـعنا حـِتـَت
وكأننا ما حناش ولادِك
لاحبـِلتى فينا من سنين
لارضِعنا من صِدرك مرار 
وكأننا حبـِّة هدوم يا دوب
ولازقة فى الجـِتـَت
تحيا مصر
تحيا على جبين العـُراة
تِـسلم تعيش واحنا نموت
ما احنا ف تابوت 
نازلين على أرضِك حفاة
وكأننا مش نبتة منك
بل كأنك 
وصَمتى نفسك بالسـِّفاح
أو أننا أولاد شوارع 
لاجئين
من أرض تانية
مولودين
من نهر غيرنهرك روينا 
يمكن أنا ..بس اللى حاسس غربتى
يا قـَهرتى .. يا وَجعـِتى 
سامحينى لو كان دمى رافـِض جِـتـّتى
سامحينى لو لومتـِـك
سامحينى لو شُـفتـِك 
عجوزة مكتَِـفـة
ما انت اللى ساكتة ع اللى حاصل للأسف
لما ابقى خاين بعد موتى 
لما احبس الكلمة وصوتى
حتى اما اقولك 
تحيا مصر
بعديها باستنى المحاكمة بالخيانة
ويطلع الخاين ملاك 
وابقى انا إبليس
ملعون بحُـكم المحكمة
وانت الشيطانة
تحيا مصر 
رغم كل العكس والعكس صحيح
رغم انى نايم تحت سقف من الصفيح
متغطِّـى بجريد الوجع
ومبلطـُه بدم الغلابة الطيبين
والبوق يوزع سمُّـه فى شموس النهار
والشاشة لسـَّة تبـِثّ موت خلف الستار 
كات مسرحية مؤلمة 
لكن خلاص نزل الستار
ورفعت الجلسة 
فى أول النهار
واتدفنت الثورة 
وأحلام الصغار
وتحيا مصر
بقلم ا لشـا عر 

أ بـو عـما ر ا لمصـرى