ايــــــــــــــــــــــــــــــــام الغربة
عن ايام الغربة ياما حكولى
وفى ارض النفط ياما وصفولى
قالوا هما سنتين ولا تلاتة
وترجع يا محمد بالدهب واللولى
طقة فى دماغى اجرب
واشوف الدهب واللولى
انا رايح للرزق ياامى
انا رايح للرزق يا خالة
بلاد النفط عاوزة اللى يعمرها
ارض النفط محتاجة لرجالة
وحياتكوا تقولوا لفوزية
تعمل معروف تستننانى
راح اغيب سنتين ولا تلاتة
وان شاء الله هرجع تانى
خدى بالك يا امة من نفسك
وادعيلى كتير ربنا يستر
وتقولى لفوزية وشرفى
راج اجيبلها شنطة وفستان اصفر
سلاماتى لعبلة وعيد
ولعمى خليل الف سلام
وان جالك يا امة الواد ناجى
يتكلم تانى على القراطين
تقوليله العقد اما انا اجى
وده برضو رأى الريس حسانين
وان جه عزوز يسأل عنى
تقوليله راح على الرزق يدور
فى ارض النفط ياما وصفولى
راح اجيب الدهب واللولى
.......................................
وسافرت فى يوم كان يوم ابيض
على دولة خليجية
فيها الدهب الاسود
وجم الكفلة يخطبوا فينا
قالوا بس تغنوا الله اكبر
والرزق اكيد هيكون لينا
وفى يوم كان رطوبة وحر
والخلق ماشية تجر فى رجليها جر
قالوا فيه غزو وحرب
انا قلت اه عملوها العدا
وانتهزوها فرصة للحرب
قالوا الاخوة فوق يا ابله
العدا مافيش لينا معاهم حرب
دى حرب فى قلب الشرق
حرب بين اخوات وحبايب
الود كان يوم بينهم زايد
قلت استر يارب اخوات وحبايب
طب كيف يحصل بينهم ضرب
قالوا الاخوة كل شئ ممكن
كل شئ جايز
ما احنا فى زمن العجايب
قلت استر يا ساتر
دا احنا غلابة
لانعرف نصنع مدفع ولا دبابة
وطال الغزو قول كام شهر
لا عرفنا نصلح ولا نحسم امر
وفى لحظة دخل الشيطان
دخل المكر
خطط ودبر وقال انا احسم امر
ولملم وفود وجيوش جرارة
وعملوها حريقة وغارة
حتى العرب يومها لبسوا النظارة
نظارة سودة . لا شافوا بها طريق
ولا شعروا بايد غدارة
وخلى الغزو .. وخلى الغزو
قالوا فيه اسلحة محظورة
لابد نبيدها لازم نعمل حظر
لجل ما يهدد جار
ولا غابة سكانها كلاب مسعورة
وطال الحظر شهر ورى شهر
سنة ورى سنة
غارة ورى غارة
طفل بيلهس
لا طايل لقمة ولا ثدى الام
كهل بيصرخ شربة دوا علبة مصل
ام بتنوح بتظرف بدل الدموع دم
أتألمنا يمكن .. بكينا يمكن
لكن ليهم مدينا ادينا
بنلفلف وندور ونمصمص فى شفايف
ونقول وين الحل .والحل مش تايه
الحل فى أدينا .. الحل فى أدينا
ابو العبادى ... من ديوانى يوم فى بلدنا