قومى يا مصر وانهضى بقلم على مصطفى

قومي يا مصر وانهضي :-
==============
اصحى وفوقي 
يلا سيبي غفوتك

سيبي الكسالى 
والتنابلة فى حتتك

سيبي اللى خانك 
واللى شربوا ميتك

بصي للولادك حفزيهم 
أنتي أقوى بهمتك

وقومي شدي 
قلاع مراكبك وانهضي

شدي الهمم 
واتوحدى واتنهدى

هدى جبال الفرقة 
يلا واسعدي

قومي وصلى 
ركعتين واتعبدى

أتوسلي ! 
قولي يا رب 
بحق مريم والنبي

ألف قلوبهم 
واجعل عاصيهم مهتدى

طول ما ولادك 
أيدهم على أيد بعضهم

عمر الأعادي 
ما حد منهم يعتدي

طول عمرنا 
الدنيا بينا بتهتدى

نادى بصوتك 
واصرخي 
هيبان نهارك

وعلى صوتك 
ما تخافيش يلا اجمدى

صحي ولادك 
قبل ما تفوت السنين

وأنت للولادك 
قادرة ليهم تشهدي

صحي الضماير 
دا إحنا لسه مكملين

وشدي حيلك 
يلا بينا نبتدى

وفهميهم مش 
هنفضل مكتوفين

إحنا لازم 
من رسولنا نقتدي

صفوا قلوبكم 
وانتوا أصلاً طيبين

وطهروها عشان 
أمورنا تنقضي

شدوا السواعد 
والهمم خطوا السنين

وقولوا لمصر 
يا أمنا يلا اسعدي

قومي يا مصر 
وانهضي !!

بقلمي ،،
على مصطفى ،،،
4/9/2014 م