كان زمان بقلم الشاعر سالم هاشم

ـــــــــــــــــــــــــــــ كان زمان ــــــــــــــــــــــــــــ
شعب طيّب مش حبيث.
شعب يهتف للرئيس
لمّا يطلع ع المنصّة يستخف
كان بجد أو بظرف..
الكل يتجنن وهيص..
..
شعب طيب
شعب خايب
عمرو نايم
عمرو غايب
واللى
صاحى يا دنيا منه فين يكون؟
ال ساكن فى المصحه
وال نايم بالسجون..
..
يوم وتانى وعام وتانى
والسنين 
سيف بيقطع فى الرقاب
للى حاضر فى الوطن
حتى ال غاب.
عاد
تغوص رجليه فى بلّة التراب
جهل ساد
فقر زاد
والمرض 
سوس بينخر فى العباد..
..
شرع مين..
لما تنسرق الحياه ويا السنين
وهوا هوا الشعب لسه
لسه واقف للمنصه
والكبير بكلامه يسحر العقول
والوعود بالخير يقول
والغلابة يصدقوا
ومبسوطين وفرحانين
غصب عنهم
مجبورين.
لكن لفين؟..
..
عدّت سنين 
والقدر يقلب شبح
يولد أسود
تفنى الوجود
ومن جديد
تبنى الحياة
تصنع ملوك
اتمسكنوا
اتمكنوا
والنيّة صارت كالظلام
كتر الكلام اتفرعنوا
هاجت الاسود
ومن جديد
كان الوجود..
..
وناس جديده اتسيّدوا
بالخطوه راحوا يسددوا
لكن ...........
الخطوه مش كافيه
تجيب علاج
يرجع العافيه
ويقضى ع الأنين..
الكل واقف منتظر
ولا عاد كلام
ولا سحر ينفع عندنا
ولا عدنا
شعب الطيبين..
ولا 
عاتشى حد مننا
يسكن مصحّة
أو 
حتى تئويه السجوون..
..ــــــــــــــــــــــــــــــــــــــــــــــــــــ
سالم
هاشم