شقاوته ياناس
----------------
كلام كله
وليل ونهار مفيش غيره
كلام منه
ببات محتار فـ تفسيره
-
وكل يومين كلام بعده
وغيره كتير كلام تاني
وتهت خلاص منيش اده
تعبت حقيقي وبعاني
-
صحيح قلبي عليه دايب
وحبه فـ قلبي وفـ دمي
بروح عنه واقــــول تايب
ويجي يقول ياشيخ سمي
-
وبرجعله وتاني يعود
يقولي كلام يجنني
ويرجع تاني يرمي وعود
وكام بسمه يطمني
-
عشان قلبي صحيح حَبه
بقوله خلاص انا مصدق
وانا عارف طريق لعبه
وعارف يوم ماراح يصدق
-
لكن عارف كمان انه
مفيش غيري وساكن فيه
وبس شقاوه دي فـ ظنه
عشان يشغلني بس وبيه
-
ومش هكدب ساعات بحلم
يعود بشقاوته يتشاقى
وبسمع منه مستسلم
عشان مشتاقله نتلاقي
-
أظن خلاص وخدت عليه
لكن برضه ساعات بشكي
وايه الحل للي انا فيه
ساعات مـ الغيظ خلاص هبكي
-
يكونش جنون وانا العاشق
بحبه ومهما كان يعمل
ماعدش الحل فيه فارق
نويت لشقاوته هتحمل
-------------------------
بقلمي .... هشام عوض محمد
السبت ... 23-8-2014م
أعجبني
