حديث بقلم الشاعر سالم هاشم

ــــــــــــــــــــــــــــــــ حديت ـــــــــــــــــــــــــــــ

ماعاد
الكلام يشفى الغليل
ولا حتى دمع البكا
راح
يغسل ظلام الليل
..
كتر النواح نسونه
والندب والولولة
شيمة لقزم عليل..
..
يا طرحة سودة بلون الليل
يا حبال فتلها الجبن وقيّدت
رحنا بالتكبيل..
..
ياليل طويل
مالهوش ضحى
بفجر طالع..
..
بإيدين كبيرة تضمنا
فى بطن الرحى..
..
تموت الجبن ف قلوبنا
وترجّع المعنى الحقيقى للحياه
ترجّع النخوه
علشان نفوق
ومعانا تبقى مصحصحا..
..
لاجل امّا نفضل متبهوين
للمصلحة..

من نامشى تانى ونفتكر ان الحياه
لينا وخلاص..
..
والدنيا خاليا من البشر
ولا غيرنا ناس
من حقهم
نضلّهم بسقفنا
سقف العروبه
والقرابة وحبنا..
..
ومن هنا ..

من قلب دار ابن الفقير لربنا..
..
بنعى العروبه
والرثاء فيها خساره اكتبوا
او حتى يشغلنى أنا
عن لعب أو حتى غنى
للتعبانين
ال اتبلينا بأم.............هم
لكن هاقول
والله يسلم فمهم
..
بيضيعولنا فى وقتنا
ويغلوشو
على الحقيقة المخجلا
عن الإجابة لميت سؤال
وزيّهم تطلع نتيجة لمسألة..
..
جاتنا البلاوى والبلا..
..
احنا العرب
المعتوهين
الملبوخين
فى ديوول طويله
معيّشانا ف برجله..
..
ما تأخذونيش
مش بعتذر
ولا حد منكم بفتكر
ان الكرامه بالكلام
من غير عمل
وصدقونى كلكم
علشان تعودو من التراب
لازم تلاقوا المرجلة..
..
ما اصل الحياة
..
واحـد وواحد
مسألة..

اجابتها سهلة ..
..
لكن الغباء
ديما بيصنع مشكله
..
حتى
ف نتيجة المسألة
.....
سالم هاشم
المنصوره
رمضان 2014