كـل حياتي / بقلم الكاتب / محمد العبدلي

كل حياتي.......
ما املكم يلي كل لحظة بذكركم 
ما املكم يلي ويه النفس يصعد بيه اسمكم
شنون املكم واني أتاني طيوفكم
رف الحمام البي عطركم
ابقى اتاني بَلَمْ حلمان بجرفكم
وآني راعي بلاي ناي متاني
ضحكات الربيع
يذكر گليبي بحجيكم
براسي ذكرى شنون ذكرى
مثل بدوي الوگع حجاية بصحاري
ومانساها ومانسيت شنون جنت آني امركم
متاني فيكم أكعد بسدة وأنام
واني أتاني الشمس من تغيب
بالكد بيهة واهس تطلع تزفلي خبركم
مثل فَلاح ويتاني 
شاتل الوردات يشتم بالتراب البي أثركم
لازم المنجل ويتذكر سنابل
عيشته بشهگات يتأمل حصاد
وهوة محصود ببعدكم
خلَّص اوراق الشعر كلهة عتابة
يعاتب النسمات ما جابت صوركم
غبشة يطلع يِكْسِر الفجر بحنانة
وينتظر ناعور گاعة يعزف الحان الحنين
يدور مثل عيونة يغرف جِفنة دمعة
ومنهو يمسح دمع يجري
ومنهو يحجي
ونت الناعور تشكي
وآني أشكي
وأبقي أشكي
لحين مايلفيني طيف
يداوي جرحي
الينزف جروح البعاد
حالم بفي العصاري البي سحركم
خلص عمري بس أتاني
وبس أعاني
وتجري كل احلامي خرسة
مكسرة بريح أمنياتي
يلي أنتوا كل حياتي
ما أملكم يلي وية النفس يصعد بيه اسمكم