<!--<!--<!--
بسم الله الرحن الرحيم
أرجو كل زملائي من ذوي الإعاقة أو غير المعاقين أن ينشرو هذا الموضوع عشان الناس كلها تعرف المصريين من فريق الصم وصلو للمركز الثاني في بطولة العالم وحصلنا علي الفضية
حضرت اليوم تكريم لإخواننا فريق الصم المنتخب المصري لكرة القدم
وكان يوم جميلا وسعدت بهم جدا
بهم حصلت مصر علي المركز الثاني علي مستوي العالم في كرة القدم للصم
مبروك ليهم ولينا ولمصر بجد فرحونا ورفعو راسنا لفوق
"وإرفع راسك فوق إنت مصري "
ولكن المؤسف في الموضوع والذي أثار دهشتي أن الإعلام المصري يهتم وماذال مصمم علي تجاهل وتهميش ذوي الإعاقة
نفسي أعرف ليه مش عايزين يفهمو أن الأشخاص ذوي الإعاقة ممكن يحققو نجاحات ونجاحات طبيعية مهياش أسطورية يعني
وإننا مثل الغير معاقين مننا كتير بيقدر يحقق نجاحات مش معني أن الإنسان عندو خلل وظيفي في عضو يبقا ده يؤثر علي كونه إنسان .
حاجة غريبة جدا مفيش ولا قناة تلفزيونية تحدثت عن هذا الإنجاز
اللي مقدرش يعملو المنتخب المصري من غير المعاقين
عندما تحدثت مع الفريق بصراحة وجدتهم منزعجين جدا وبصراحة عندهم حق
هو الإعلام ده مش شاطر غير إنه يجيب شخص ذوي إعاقة ويخلية يتكلم ويجيب خلفية حزينة وراه كده والمذيع أو المذيعة يعني الدمعة هتفر من عينو
كإننا البؤساء علي الأرض مش كفاية إنه خرب عقول الناس بعرضهم للمعاقين بالشكل السخيف بتعهم وكمان لما يكون في حاجة جميلة يتجاهلوها ,
مش عارف هل هم حابين يركزوا علي الجانب التسولي للمعاق ولا إيه ؟
خاطبناهم كثيرا وراسلناهم كثيرا وعملنا ندوات خاصة بالإعلام وقضايا ذوي الإعاقة
ولكن شكلهم فعلا صم بكم عمين ولا يفهمون
لو كان هذا الفريق هو المنتخب المصري من غير المعاقين كان زمان مصر كلها مولعة وأخبار وهيصة
وجميع القنوات تهنئ وتبارك وتغني وترقص ,
بصراحة إحنا مستأين جدا من هذه النظرة السخيفة من القائمين علي الإعلام وبنرفض هذه الطريقة السخيفة والتجاهل والتهميش
وبتهمهم إنهم السبب في أن الناس بينظرو لينا علي إننا متسولين أو بركة أوأشخاص معجزة
وياريت يراجعو أنفسهم ويعيدو التفكير في قضية ذوي الإعاقة بشكل إيجابي شوية
من حق فريق الصم المشرف لكل مصري أن يعرف المجتمع المصري بالإنجاز اللي هما حققوه
أرجو كل زملائي من ذوي الإعاقة أو غير المعاقين أن ينشرو هذا الموضوع عشان الناس كلها تعرف المصريين من فريق الصم وصلو للمركز الثاني في بطولة العالم
وللمرة الثانية أشكر زملائي وإخواني فريق الصم علي رفع رأسنا ورأس مصر كلها وبدعو لهم بالنجاح المستمر
تحياتي
اسامة طايع
مدير عام جمعية7مليون معاق
المدرب المحترف المعتمد في التنمية البشرية
