صباح
صباح الكوسة لما تكون ثقافة شعب
صباح الوكسة والنكسة وتعب القلب
صباح النور على بكرة اللى رافضنا
نقوله تعالىمتخفشى ولا يعديش
صباح اللقمة متهانة وقرش مفيش
صباح طافح على الشاشة سفالتهم
نعلم مهما بنعلم يهد علامنا سفاهتم
صباح الدودة لما تقوم وتتمطع 
وأم قويق تربى الضفر وتطرقع 
صوابع كفتة ملبوسة ف الف رغيف
وكلب نضيف بتسرحله كوافيرة
صباح بعتاله تسبيلة فنخ الحلو ابو ريالة
زبالة تغطى جناينهم حسالة ويسألوا عنهم 
وانا الصياد كسرلى الباشا سنارة
وانا النجار ضربنى وكسر الفارة 
وانا الفران حرقنى بناره وسجنى 
وانا اللى بعلم الامة وازيل الجهل من راسكم
بتسخر منى حراسكم واروح الجامعة كعابى
وابن الكلب بيعدى ويلمح صورتى ف مرايا
فيضحك هو وصحابه دخلتوا الجهل من بابه
انا اوجاعى تسعدكم واوجاعكم باداويها
لو عمرى دخلت جنتكم ولا حابب اعيش فيها 
خطاوى علينا مكتوبة وعليكم م القلوب دعوة
منصور عبد المقصود