صورة وطن
لساك بتحفر فى الضمير
عمال تدور عن وطن
نام الوطن فى عيون صغار
راسمين على قلب الجدار
صورة علم 
الفل اول لون على قماشه الحرير
أسود على كل اللى مات فيه الضمير
احمر بلون الدم فى عيون الطغاه
عاش الولد واهتم
يقلع جزور الهم
من فوق جبينك يا وطن
طافح على جبينهم عرق
لما اتسرق 
حبات تراب
رجع التراب ممزوج بدم
دم اللى عايش يحرسك من غير سلاح
الفجر لاح 
نادى الإمام 
ساوو الصفوف
توابيت ألوف
مترصصين
علشان متمسح دمعتك
ملايين بشر واقفين فى خدمة حضرتك
والبدر رافض يكتمل 
شايف فى بكره المحتمل
سرطان معشش فى الأمل
قالوا العمل 
ف ايدين شباب
وأصغر شبابك شعره شاب
لما انحنى 
أكبر هرم 
يوم ما اتوجع
فيك الضمير 
افرد شباكك يا وطن 
نام العطن جوة القلوب 
الضحكه مرسومه على وش الجدار
علشان ميحفظها الصغار
ويعيشوا دايما فى انتظار 
انك تعود 
تضحك لهم 
ويشوفوا فى عنيك النهار
منصورعبدالمقصود